[A:༤༥]སུ་སྟོན་ཏོ་ཞེས་གསུངས་པ་དང༌། དེ་ལ་ངེས་པར་དེ་ལྟར་ཡིན་པའི་ངེས་ཤེས་ཀྱང་སྐྱེས་སོ། །གཞན་ཡང་ཆོས་རྗེ་ས་སྐྱ་པ་ཆེན་པོའི་རྣམ་པ་ཉིད་འཁོར་བྱང་ཆུབ་སེམས་དཔའ་ཆེན་པོ་བརྒྱད་ཀྱིས་བསྐོར་བའི་དབུས་ན་བཞུགས་པ་གཟིགས། བཅོམ་ལྡན་འདས་དགྱེས་པ་རྡོ་རྗེ་འཁོར་ལྷ་མོ་བརྒྱད་ཀྱིས་བསྐོར་བའི་སྤྲུལ་པའི་དཀྱིལ་འཁོར་གཡས་ན་བཞུགས་པ་དང༌། དེ་བཞིན་གཤེགས་པ་ཤཱཀྱ་ཐུབ་པ་འཁོར་ཀུན་ཤེས་ཀཽཎྜི་ནྱ་ལ་སོགས་པ་དགྲ་བཅོམ་པ་བརྒྱད་ཀྱིས་བསྐོར་བ་གཡོན་ན་བཞུགས་པའི་བཀོད་པ་རྣམ་པར་འཕྲུལ་པ་ཆེན་པོ་མངོན་སུམ་དུ་བསྟན་ནས་ཁྱོད་རབ་ཏུ་བྱུང་ན་སུ་ལ་རབ་ཏུ་བྱུང༌། དབང་བསྐུར་བ་ལེན་ན་གང་ལ་དབང་ལེན་ཞེས་གསུངས་པ་དང༌། བདག་རབ་ཏུ་བྱུང་ངམ་དབང་བསྐུར་ལེན་ན་མཁན་པོར་གྱུར་པ་དང༌། རྡོ་རྗེ་སློབ་དཔོན་དུ་གྱུར་པ་ནི་ཆོས་ཀྱི་རྗེར་གྱུར་པ་ཁྱོད་ཉིད་དོ་ཞེས་ཞུས་པས། དེ་ཁོ་ན་བཞིན་ཏེ་ཁྱོད་ཀྱིས་ལེགས་པར་རྟོགས་པ་དེ་ཁོ་ན་བཞིན་ནོ་ཞེས་དབུགས་དབྱུང་ནས་ལུང་བསྟན་པ་དང༌། གཞན་ཡང་འདི་ལྟར་ཐོས་ཏེ། བདག་ཅག་གི་ཆོས་ཀྱི་རྗེ་འདི་སྐུ་གཤེགས་པའི་དུས་ཀྱི་དགུང་ལོ་གཉིས་ཀྱི་གོང་རོལ་ན། བདེ་བ་ཅན་གྱི་ཞིང་ཁམས་སུ་སྤྱན་འདྲེན་པ་ལྷའི་ཕོ་ཉའི་བཀོད་པ་དཔག་ཏུ་མེད་པ་རྣམས་ལ་རྣམ་གྲངས་དུ་མའི་སྒོ་ནས་ཕྱིར་བཟློག་གོ །དེ་ནས་ཡང་ལོ་གཅིག་གི་གོང་རོལ་དུ་ལྷའི་ཚོགས་དཔག་ཏུ་མེད་པ་དག་འཇིག་རྟེན་གྱི་ཁམས་མི་མཇེད་འདིའི་མི་བསྔགས་པ་བརྗོད་དེ། བདེ་བ་ཅན་གྱི་བསྔགས་པ་དཔག་ཏུ་མེད་པ་བརྗོད་པའི་སྒོ་ནས་སྤྱན་འདྲེན་པར་བརྩོན་པ་རྣམས་ལ། ཁོ་བོ་འཇིག་རྟེན་གྱི་ཁམས་བཟང་བ་ལ་ཆགས་པ་མི་སྐྱེ། ངན་པ་ལ་མངོན་པར་མི་དགའ་བ་མེད་ལ། སངས་རྒྱས་ཀྱི་ཞིང་ཡོངས་སུ་སྦྱོང་བ་ལ་འཇིག་རྟེན་གྱི་ཁམས་དམན་པ་ཉིད་ཁྱད་པར་དུ་འཕགས་པ་ཡིན་ཞིང༌། གཞན་ཡང་བདག་ལ་ཉེ་བར་ལྟོས་པའི་མགོན་མེད་པར་