[A:402]btags rdzun gyi rnam par thar/ /mthong na dam pa'i spyod tshul lhug pa ru/ /smra ba sngon bsags legs byas bye bas nyos/ /ku sha'i rtse mos 'thor te rgya mtsho'i mtha'/ /'dzad byed dka' thub bsten pa'i rjes 'gro ba/ /phra mo'i blo gros khab kyi mig bu ru/ /khyod yon lhun po 'dzud pa'i go skabs ci/ /'on te rin chen gling nas nor bu'i tshogs/ /ded dpon gcig gis 'dren par mi bzod kyang / /rang gis ji tsam 'khur nus bdog pa yis/ /dbul ba'i gdung sel 'dod 'jo dngos po'i gshis/ /'khyog tshig chags pa'i gdong pa rig byed sgor/ /sprul pa'i zol sbyor rgan po ma yin pa'i/ /mkhas grub ngang tshul gser sgong yongs smin pa/ /sngon med tshangs par lta la lha rnams brel/ /phyogs 'dzin gdon gyis phrag dog sbyin skyes mgor/ /mthu stobs rdo rje rtse brgya rab bsnun kyang / /ris med 'gro la brtse ba'i spyan stong dkyus / /ring por skyong ba'i bshes gnyen 'chi med gtso/ /rlabs chen mdzad pa sos kyi dga' ston dus/ /'dren byed tshig sbyor dpyid kyi lang tsho ma/ /spel legs zlos gar 'phreng mdzes gsong po'i glu/ /gzur gnas gzhan gsos mgrin nas len 'di nyon/ /de yang slob dpon daNDis/ shis brjod phyag bya dngos po ni/ /nges par bstan pa'ang de yi sgo/ /zhes thog mar shis brjod/ phyag bya/ dngos po nges bstan rnams sum ldan/ gnyis ldan sogs ci rigs pa bshad pa'i da lam phyi ma'i sgo nas tshigs su bcad pa sngon du song bas skabs su gleng bar bya ba ni/ ji skad du/ mchog gi khyad par nyid la reg na de yi yon tan cha shas kyis/ /