[A:590]tu byung nas rje btsun rdo ring pa chen pos khyod 'bod du btang ba yin 'gro'am mi 'gro zer ba la thugs mi spro ba'i rnam pas lam 'bras bshad 'phro yang yod gsungs pas skas de la rgyab 'dzegs kyis log song rjes skas bsdus shing mthongs khung mi snang ba gyur na yang ltas de dag dang rdo rje btsun mos mkha' spyod du gshegs par bskul bas zhing khams 'pho'am dgongs pa'i thugs som nyir gyur pa'i tshe/ re zhig lon pa na kun spangs rin po che 'od gsal gyi ngang du phebs nas mu stegs pa'i rgyal po rgan pa de shi bas gzhon pa dang khyed las 'brel mi 'dug da lam gzhan zhig btang yod skor cig 'byon mi dgos 'dugs gsungs par snang zhing / skal ldan gyi slob ma mang pos yun ring por bzhugs pa'i rten 'brel gyi sgo sgrig pa'i gsol btab dang / rje btsun a ba dhU tI pa'i bslab bya'i gsung rnams thugs kyis dran te kha ba ri pa rnams kyi bstan 'gro'i ched du sku tshe byin gyis brlabs pa ni/ 'phags pa yongs su mya ngan las 'das pa'i mdo las/ de bzhin gshegs pa'i sku ni rdo rje'i sku yin te/ deng phyin chad khyod kyis don 'di rtse gcig pa'i sems kyis yid la bya yis/ zag bcas kyi skur ni mi bsam mo/ /zhes 'ja' lus rdo rje'i sku 'grub pa thams cad kyi ngang tshul yin zhing gdul bya so so'i las snang gi dbang gis mthong tshul sna tshogs 'byung ba ni/ myang 'das rgya gar 'gyur las/ res 'ga' ni sems can rnams kyis de bzhin gshegs pa grongs so snyam du yang dag par shes mod kyi/ de bzhin gshegs pa ni dus thams cad du rtag pa dang brtan pa dang ther zug pa yin te/ zhes 'byung ba ltar ro/