[A:589]'phrin las tshul bzhin du sgrub pa mang la/ de bas ches lhag pa rdo rje'i chos skyong rnams kyang bran du 'khol te ji ltar bsgo ba lhur len pas/ thams cad mkhyen pa mkhyen brtse'i zhabs kyis mdzad pa'i bstod par/ gur gyi mgon po dpa' bo bram ze'i gzugs/ /'chi bdag dbang phyug ging lnga gza' gdong sogs/ /dam can rgya mtsho mngon sum bran du 'khol/ /mthu stobs nus pa'i gter la gsol ba 'debs/ /zhes byung bas kyang shes nus/ de yang kun spangs rin po ches khyed la mkha' spyod ma'i byin rlabs byas res kyis ltas ya mtshan pa re yong gin 'dug pas mkha' spyod du myur bar 'khrid nyen yod tshul tshe sgrub la nan tan skyed mdzod sku tshe ring ba byung na bstan pa dang sems can la phan zhing mthu stobs chen po yong ba'i lung bstan ltar snga gong zhig gzigs snang la skas ring po btsugs pa la bud med mda' dar khyer ba gsum babs byung nas khyed gdan 'dren la yongs zer bar da lta nga la pha ma'ang yod pas mi 'gro gsungs par bud med de rnams log song / grang mo cher bzhugs skabs shig 'od gsal gyi ngang du rje btsun rdo ring pa chen po byon te da lta rgya gar lho phyogs na mu stegs kyi rgyal po stobs che ba zhig yod pas de 'dul du khyed 'gro dgos pa 'dug gsungs par brten zhag 'ga'i bar bla ma la gsol ba 'debs pa mdzad pa na 'jam dbyangs mkhyen rtse'i dbang phyug sku drung du bzhugs pa'i nub cig dag snang du nam mkha' nas mthongs khung lta bu skya shar re ba nas rus pa'i skas btsugs par bu mo dmar mo lo brgyad tsam lon pa rus rgyan chab be ba btags pa zhig rgyab 'bab