[A:༥༩༠]ཏུ་བྱུང་ནས་རྗེ་བཙུན་རྡོ་རིང་པ་ཆེན་པོས་ཁྱོད་འབོད་དུ་བཏང་བ་ཡིན་འགྲོའམ་མི་འགྲོ་ཟེར་བ་ལ་ཐུགས་མི་སྤྲོ་བའི་རྣམ་པས་ལམ་འབྲས་བཤད་འཕྲོ་ཡང་ཡོད་གསུངས་པས་སྐས་དེ་ལ་རྒྱབ་འཛེགས་ཀྱིས་ལོག་སོང་རྗེས་སྐས་བསྡུས་ཤིང་མཐོངས་ཁུང་མི་སྣང་བ་གྱུར་ན་ཡང་ལྟས་དེ་དག་དང་རྡོ་རྗེ་བཙུན་མོས་མཁའ་སྤྱོད་དུ་གཤེགས་པར་བསྐུལ་བས་ཞིང་ཁམས་འཕོའམ་དགོངས་པའི་ཐུགས་སོམ་ཉིར་གྱུར་པའི་ཚེ། རེ་ཞིག་ལོན་པ་ན་ཀུན་སྤངས་རིན་པོ་ཆེ་འོད་གསལ་གྱི་ངང་དུ་ཕེབས་ནས་མུ་སྟེགས་པའི་རྒྱལ་པོ་རྒན་པ་དེ་ཤི་བས་གཞོན་པ་དང་ཁྱེད་ལས་འབྲེལ་མི་འདུག་ད་ལམ་གཞན་ཞིག་བཏང་ཡོད་སྐོར་ཅིག་འབྱོན་མི་དགོས་འདུགས་གསུངས་པར་སྣང་ཞིང༌། སྐལ་ལྡན་གྱི་སློབ་མ་མང་པོས་ཡུན་རིང་པོར་བཞུགས་པའི་རྟེན་འབྲེལ་གྱི་སྒོ་སྒྲིག་པའི་གསོལ་བཏབ་དང༌། རྗེ་བཙུན་ཨ་བ་དྷཱུ་ཏཱི་པའི་བསླབ་བྱའི་གསུང་རྣམས་ཐུགས་ཀྱིས་དྲན་ཏེ་ཁ་བ་རི་པ་རྣམས་ཀྱི་བསྟན་འགྲོའི་ཆེད་དུ་སྐུ་ཚེ་བྱིན་གྱིས་བརླབས་པ་ནི། འཕགས་པ་ཡོངས་སུ་མྱ་ངན་ལས་འདས་པའི་མདོ་ལས། དེ་བཞིན་གཤེགས་པའི་སྐུ་ནི་རྡོ་རྗེའི་སྐུ་ཡིན་ཏེ། དེང་ཕྱིན་ཆད་ཁྱོད་ཀྱིས་དོན་འདི་རྩེ་གཅིག་པའི་སེམས་ཀྱིས་ཡིད་ལ་བྱ་ཡིས། ཟག་བཅས་ཀྱི་སྐུར་ནི་མི་བསམ་མོ། །ཞེས་འཇའ་ལུས་རྡོ་རྗེའི་སྐུ་འགྲུབ་པ་ཐམས་ཅད་ཀྱི་ངང་ཚུལ་ཡིན་ཞིང་གདུལ་བྱ་སོ་སོའི་ལས་སྣང་གི་དབང་གིས་མཐོང་ཚུལ་སྣ་ཚོགས་འབྱུང་བ་ནི། མྱང་འདས་རྒྱ་གར་འགྱུར་ལས། རེས་འགའ་ནི་སེམས་ཅན་རྣམས་ཀྱིས་དེ་བཞིན་གཤེགས་པ་གྲོངས་སོ་སྙམ་དུ་ཡང་དག་པར་ཤེས་མོད་ཀྱི། དེ་བཞིན་གཤེགས་པ་ནི་དུས་ཐམས་ཅད་དུ་རྟག་པ་དང་བརྟན་པ་དང་ཐེར་ཟུག་པ་ཡིན་ཏེ། ཞེས་འབྱུང་བ་ལྟར་རོ།