[A:587]pa rnam rgyal/ yangs can mkhan po byams pa bsod nams mtha' yas/ gzims shag chos rje ngag dbang rnam rgyal sogs mtha' klas pa byon te ru lag stod kyi 'dzin mar kha'u brag rdzong pa'i ring lugs gdugs dkar po gcig gis mngon par khyab pa'i 'phrin las kyi 'jug pa mchog tu yangs/ rje 'di nyid kyi bslab ston ltar klu sgrub rjes gzhi bsnyen mdzad par gegs kyi rnam pa cung zad byung ba'i tshe zhu yig phul ba'i lan 'di lta ste/ oM swa sti/ dpal brgyud pa kun 'dus rigs brgya'i mgon/ /pha dngos grub 'byung gnas yid bzhin nor/ /rje dran pas gdung sel rdo ring pa/ /bu snod ldan gyi rgyud la byin gyis rlobs/ /khyed dal 'byor rten mchog legs par thob/ /phyi thos bsam gyi sgro 'dogs rgya cher bcad/ /yongs las 'phro dang brtson 'grus gnyis su 'dzom/ /lam rdo rje theg pa'i yang bcud thob/ /dus deng sang bsam gtan gyi khang bu na/ /lus zab gsal lha ru lam me bsgom/ /ngag rdo rje'i sngags su dir ri sgrog /sems bde chen gyi ngang du cham me ba/ /chos 'di 'dra'i nyams len shes tsa na/ /rten dal 'byor la snying po longs pa yin/ /ma 'gro ba'i drin lan lon pa yin/ /bu mkhas pa'i thugs la de ltar zhog /sems dga' ba spro ba rgya cher skyed/ /yang dar cig thugs la 'di ltar zhog /rje bla ma spyi gtsug na 'du 'bral med/ /chos ci gnang rang sems dag pa'i 'khrul/ /de rim gnyis lam du 'khyer tshul shes/ /da gang ltar byas kyang bde ba yin/ /ces tshigs su bcad pas mdor bsdus te gdams nas