[A:༥༨༧]པ་རྣམ་རྒྱལ། ཡངས་ཅན་མཁན་པོ་བྱམས་པ་བསོད་ནམས་མཐའ་ཡས། གཟིམས་ཤག་ཆོས་རྗེ་ངག་དབང་རྣམ་རྒྱལ་སོགས་མཐའ་ཀླས་པ་བྱོན་ཏེ་རུ་ལག་སྟོད་ཀྱི་འཛིན་མར་ཁའུ་བྲག་རྫོང་པའི་རིང་ལུགས་གདུགས་དཀར་པོ་གཅིག་གིས་མངོན་པར་ཁྱབ་པའི་འཕྲིན་ལས་ཀྱི་འཇུག་པ་མཆོག་ཏུ་ཡངས། རྗེ་འདི་ཉིད་ཀྱི་བསླབ་སྟོན་ལྟར་ཀླུ་སྒྲུབ་རྗེས་གཞི་བསྙེན་མཛད་པར་གེགས་ཀྱི་རྣམ་པ་ཅུང་ཟད་བྱུང་བའི་ཚེ་ཞུ་ཡིག་ཕུལ་བའི་ལན་འདི་ལྟ་སྟེ། ཨོཾ་སྭ་སྟི། དཔལ་བརྒྱུད་པ་ཀུན་འདུས་རིགས་བརྒྱའི་མགོན། །ཕ་དངོས་གྲུབ་འབྱུང་གནས་ཡིད་བཞིན་ནོར། །རྗེ་དྲན་པས་གདུང་སེལ་རྡོ་རིང་པ། །བུ་སྣོད་ལྡན་གྱི་རྒྱུད་ལ་བྱིན་གྱིས་རློབས། །ཁྱེད་དལ་འབྱོར་རྟེན་མཆོག་ལེགས་པར་ཐོབ། །ཕྱི་ཐོས་བསམ་གྱི་སྒྲོ་འདོགས་རྒྱ་ཆེར་བཅད། །ཡོངས་ལས་འཕྲོ་དང་བརྩོན་འགྲུས་གཉིས་སུ་འཛོམ། །ལམ་རྡོ་རྗེ་ཐེག་པའི་ཡང་བཅུད་ཐོབ། །དུས་དེང་སང་བསམ་གཏན་གྱི་ཁང་བུ་ན། །ལུས་ཟབ་གསལ་ལྷ་རུ་ལམ་མེ་བསྒོམ། །ངག་རྡོ་རྗེའི་སྔགས་སུ་དིར་རི་སྒྲོག །སེམས་བདེ་ཆེན་གྱི་ངང་དུ་ཆམ་མེ་བ། །ཆོས་འདི་འདྲའི་ཉམས་ལེན་ཤེས་ཙ་ན། །རྟེན་དལ་འབྱོར་ལ་སྙིང་པོ་ལོངས་པ་ཡིན། །མ་འགྲོ་བའི་དྲིན་ལན་ལོན་པ་ཡིན། །བུ་མཁས་པའི་ཐུགས་ལ་དེ་ལྟར་ཞོག །སེམས་དགའ་བ་སྤྲོ་བ་རྒྱ་ཆེར་སྐྱེད། །ཡང་དར་ཅིག་ཐུགས་ལ་འདི་ལྟར་ཞོག །རྗེ་བླ་མ་སྤྱི་གཙུག་ན་འདུ་འབྲལ་མེད། །ཆོས་ཅི་གནང་རང་སེམས་དག་པའི་འཁྲུལ། །དེ་རིམ་གཉིས་ལམ་དུ་འཁྱེར་ཚུལ་ཤེས། །ད་གང་ལྟར་བྱས་ཀྱང་བདེ་བ་ཡིན། །ཅེས་ཚིགས་སུ་བཅད་པས་མདོར་བསྡུས་ཏེ་གདམས་ནས་