[A:507]maNDa la dharma pA la sa pa ri wA re bhyaH kun khyab kun gyi byed po gcig nyid srid zhi'i gzugs kyis kun la 'khyud/ /rgyal dang rgyal sras slob mar bcas pa'i tshogs kyi gtso bo rgyal ba rje/ /mtha' yas mtha' med 'gro ba'i skyabs mchog rje btsun bla ma srid mtha' bar/ /gtsug rgyan gtsug gi nor bur gus mchod 'bral ba med par gtsug tu bzhugs/ /zhes sogs mkha' 'gro lnga bstod bskul dang / dam can srung ma dgyes pa'i rnal 'byor pa/ /rdo rje 'dzin pa blo gsal rgya mtsho'i sdes/ /gnas lugs bde ba chen po'i mkha' dbyings su/ /rab zab thabs kyis bsgrubs pa'i mchod pa'i sprin/ /zhes rgyud dang man ngag las byung ba'i phyi nang gsang mchod rgyas par dbul mthar/ rgyal ba'i bstan pa spyi dang bye brag tu/ /dpal ldan sa skya pa zhes grags pa yi/ /bstan pa'i nying khu rje btsun rdo ring pa'i/ /bstan pa sa yi phyogs 'dir dar rgyas mdzod/ /de nyid 'dzin dang mchod pa'i sbyin pa'i bdag /mi nor 'khor bcas bsrung dang sba ba dang / /'du 'bral med par rtag tu skyong bar mdzod/ /ces dang / da lta'i gnod byed mi dang mi ma yin/ /skad cig nyid la mngon sum 'dir khug la/ /rab rnon mtshon chas mgo lus dum bur gtubs/ /khrag zhag don snying dmar po hab kyis thob/ /ces phrin las rgyas par mdzad/ ring zhig na 'gro ba'i las smin bdo ba rgyal po gzugs can snying po ltar tshad bzung dka' mod/ hor bya rig sogs rjes ma rnams la'ang srung ma'i za kha zug ste ming gi lhag mar gyur/