[A:505]bla ma 'khor lo sdom par gzigs/ /dge 'phel chos kyi khri la spyan 'dren pa'i/ /gzhi bdag gus pa'i rnam 'phrul pho nya'i tshul/ /zhabs kyi padmar son la gsol ba 'debs/ /ngag dbang dbyangs can lha mo'i bzlas brjod tshe/ /mkha' la me tog dkar po'i char babs shing / /rgyud mangs sgra snyan rna ba'i bdud rtsi mchog /'od gsal ngang du gsan la gsol ba 'debs/ /mnal lam ngang du dpa' bo mkha' 'gro'i tshogs/ /sgron me bteg nas rje btsun rdo ring pa'i/ /'khor slob 'tshol ba'i zol gyi rnam thar mchog /rtsom par bskul ba gzigs la gsol ba 'debs/ /grangs med mkha' 'gro 'du ba'i tshogs dbus kyi/ /gtso mo padma'i dra ba can zhes pas/ /glegs bam bstan cing cho 'phrul sna tshogs bcas/ /'dri ba'i yo byad gtad la gsol ba 'debs/ /chos kyi khri la 'khor ba'i rab byung gis/ /rgyal ba'i rtogs brjod klog pa'i tshul can la/ /mkha' 'gro'i tshogs rnams dga' bas nyan pa sogs/ /dge mtshan du ma gzigs la gsol ba 'debs/ /rje btsun bla mas zhal bzang yang yang bstan/ /rnam thar rtsom pa'i bya ba mthar phyin tshe/ /dpal ldan 'dod khams dbang mos dgyes pa yi/ /srung mar zhal gyis bzhes la gsol ba 'debs/ /zhes dngos shugs sna tshogs pa/ de ltar mkhas btsun bzang po'i bdag nyid can rnams ni 'khor ba'i mtha' ma rdzogs pa de srid du rnam par dkar ba'i 'phrin las kyi rgyun chad pa med par 'jug pa chos nyid