[A:504]mtshan dpal bzang po zhes bsnan zhing bag yod pa kho na mdzad de tshul khrims rnam par dag pa ni/ ji skad du/ kha na ma tho phra rab la'ang / /thugs ni shin tu 'jigs par mdzad/ /dran dang shes bzhin ldan pa yis/ /tshul bzhin ma yin yid mi mdzad/ /bag yod dran dang g.yo sgyu med/ /ltung ba'i nyes pas khyod ma gos/ /zhes mnyam med jo bo chen po'i rnam par thar pa dang mtshungs so/ /bzlas brjod nus pa'i glog zhags thod 'phreng la/ /'khyug tshe bdud snying sngags smyon thog gzer gyis/ /'bigs kyang lha rgyud bskul ba'i dbyar gyi rnga/ /thos pas dngos grub rma bya'i mngal khur 'dzin/ /bde stong ye shes me lces gnyis 'dzin shing / /bsreg pa'i cho 'phrul la mtshar byis pa'i blo/ /skyon med gnyug ma'i lam gyis 'dus mtha'i 'phrang / /brgal te bcu gsum sa la snyegs 'di ci/ /mtha' klas chos kyi rang mtshang rjen pa ru/ /shar tshe kun rdzob 'khrul pa dbyig po ches/ /med kyang mngon sum snang ba'i sprul bsgyur gyis/ /sgyu ma'i glang seng 'jigs tshul bag la zha/ /bdag 'dra'i 'gro snying lcags khams 'khor ba la/ /nges par mi 'byung tshe 'di'i grabs gshom na/ /mthon po'i sa la gshegs kyang tshangs spyod grus/ /srid mtshor sgrol brdzu'i rdzun gyis 'drid 'di ci/ /'on te chags bral tshul khrims ngad 'thul yang / /dga' bzhi'i 'gros kyi bde stong smin legs mar/ /mnyam sbyor rtse dga' rgod pa'i theg gsum don/ /'gal med mdud pa'i gnad de lhod por grol/ /gsol 'debs las/ grub dbang