[A:346]du ma dang / rgyud sde rin po che las ji skad gsungs shing / bla ma brgyud pa'i phyag len las 'byung ba ji lta ba'i rgyud sde chen po bzhi'i gzungs sngags zab mo rab tu mang po rnams gos dar gyi na bza' dang dri bzang po du ma'i bkur sti dang bcas te nang rdzongs su bzhugs su gsol ba'i mthar gnod sbyin pho mo'i 'khor lo legs par bris te thugs ches par bsgrubs pas zhabs bsdams te/ rten gyi bya ba yongs su rdzogs nas/ dpal kye rdo rje'i rdul tshon gyi dkyil 'khor zhal phye nas/ rgyud sde las gsungs pa'i cho ga phun sum tshogs pa'i rab tu gnas pa mdzad de/ rdzong phun tshogs rab brtan la spyan 'dren pa'i tshe/ mi mang pos do li la spyan drangs pa na/ mig mthong ba zhig gis/ mi nag po dung long skya khral le ba gzhan pas nyis 'gyur gyi che ba gnyis kyis khri'i mtha' gnyis nas bteg ste 'gro'i 'dug pa mngon sum du mthong 'dug pa ltar/ spyan 'dren zhu mi rnams la ngal ba cung zad kyang med par dga' zhing spro ba'i ngang nas spyan drangs/ de'i tshe mtshan mo'i dus yin pas lam mtshon gyi me sgron chen po gnyis shig dngos su yod mod/ rgyang ring po nas lta ba thams cad kyis mthong bar/ g.yas g.yon dang mdun rgyab gnyis te bzhir me sgron chen po tshad med pa re dang bcas pa'i 'od kyis/ phyogs thams cad nyin mo ltar gsal ba sogs yid ches pa'i ltas du ma dang lhan cig tu phebs/ slar rab tu gnas pa shin tu rgyas pa tshar gnyis mdzad/ de snga phyir rab tu gnas pa de dag gi skabs su nam mkha' baiDUrYa sngon po'i me long ltar dwangs pa'i ngos su/ kha dog dkar po dang / sna lnga pa'i 'ja'i sprin dar thag brkyang pa lta bu dang / pa Ta lta bu/ dpag bsam gyi sdong po