[A:347]lta bu la sogs pa thams cad rtsa ba gdan sa ngos su zug /rtse mo bo dong phyogs su 'du ba'i gseb nas me tog dkar po sil ma'i rgyun kha ba ltar babs pa dang / zhi rgyas kyi sbyin sreg gi me bkra rnams kyang mchog tu legs pa/ mar me'i phreng ba khor yug tu 'dzin pa sogs dge ba'i mtshan ma du ma dang / byin rlabs kyi ltas so so skye bo'i blo'i khyon las 'das pa rnams kyis mngon par mtho ba'i sku 'dra rin po che yid bzhin gyi nor bu dbang gi rgyal po las kyang mchog tu bsngags pa 'di phyi'i don thams cad tshegs chung ngus bde blag tu 'grub pa 'di nyid bzhengs pa'i zhal bkod mdzad de/ dus de nas sde srid gnas gsar ba mi nor thams cad yar ngo'i zla ba ltar gyur la/ bdud dang bgegs thams cad las rnam par rgyal ba'i rgyal thabs chen po thob pa yin pas/ rje btsun dam pa 'di'i sku drin gzhan rnams phar zhog /re zhig 'di'i cha tsam yang bdag cag rnams kyis bskal pa'am bskal pa bas lhag par 'bad kyang khyer ba'i thabs ga la yod/ rdo rje 'chang dbang gsung gi mdzod 'dzin pas/ /rdo rje 'dzin pa kun gyi zur phud rtser/ /rdo rje'i gsung gi utpal gar byed pa/ /rdo rje 'chang chen grags pa rgyal mtshan nyid/ /slar yang ljongs 'dir byon pa khyod nyid kyis/ /nyid kyi sku brnyan bsod nams las grub pa/ /grub pa mchog gi dge mtshan pha mtha' yas/ /mtha' yas 'gro ba'i bsod nams zhing du btsal/ /gang 'dir gus pas las byed de dag kyang / /gang 'di'i rdul phran dang mnyam rgyal srid byed/ /gang gi rgyu tshogs 'bad med sgrub byed des/ /gang bsam don gnyis 'grub la gegs med ces/ /tshad mar gyur pa'i gsung