[A:345]sgrub pa'i skabs su'ang gdugs lhag par 'jam pa sogs mthun rkyen lhun gyis grub pa dang / bar skabs su bzo bo rnams kyis sku tshad kyi thig skud bor te/ bskyar nas gdan sa chen por bgrod par chas pa na/ rje 'di gdugs la bzhugs pa'i drung ha cang mi ring ba skad snyan po sgrog bzhin pa'i bya rog chen po gnyis 'chams 'gros byed cing 'dug pa zhig de'i kha na thig skud khyer te rje 'di'i drung du 'bul ba/ bo dong gi gzhi bdag lha mo dmag zor ma la bar chad bsrung ba'i bka' bsgo mdzad pas lha mo de bud med tha mal pa'i gzugs kyis bzo bo rnams gnas pa'i khang thog tu bzhugs pa/ bo dong gi mi dpon gling chen mo zhes bya bas mthong ste/ rin po che 'di lta bu'i sku mtshams dam po la bzhugs pa la ci phyir 'dir 'ongs zhes rgol ba na/ bud med nam mkha' la yud kyis song nas dmag zor ma gnas pa'i gtsug lag khang gi phyogs su yal song ba na/ 'jigs shing skyi g.ya' ba mi tshugs pa tsam byung ste drung du zhus pas lha mo de bar chad bsrung phyir 'ongs par 'dug gsung ba sogs ngo mtshar ba'i ltas du ma dang bcas bzhin du mthar phyin/ gzungs kyi yi ge zhal bkod dang / dag byed la sogs pa bdag gi bla ma mnga' ris pa chen po de'i tshe nye gnas la bzhugs pa des legs par grub nas/ de bzhin gshegs pa'i ring bsrel/ rje btsun rin po che nyid kyi thugs dam bcom ldan 'das 'khor lo bde mchog lhan skyes kyi sku/ dpal ldan sa skya paNDi ta'i phyag bris kyi kha byang btab pa/ rje btsun nyid kyi dbu lo/ /bla ma gong ma'i ring bsrel la sogs pa'i byin rlabs rten khungs btsun pa