[A:344]sogs pa mang du gnang ba dang / rten gsum mang po'i rab tu gnas pa yang mdzad/ lo de'i ston sbyin bdag chen po la 'phral phugs su phan bde bsam gyis mi khyab pa 'byung ba dang / yul phyogs der rje btsun sa skya pa'i bstan pa rin po che dar zhing rgyas pa'i ched du/ rje btsun rin po che grags pa rgyal mtshan gyi sku 'dra bzhengs pa'i bka' gros mdzad de/ jo nang skyid sbug tu phebs nas/ de la dmigs pa'i thugs bsnyen kha gso ba dang khyad par rje btsun mchog gi bstod pa chos kyi rgyal po 'phags pas mdzad pa'i shlo ka gcig po'i steng du/ grags ldan dam pa rdo rje 'chang / /bstan pa'i rgyal mtshan 'dzin slad du/ /dge bsnyen mchog gi skur ston pa/ /mthu stobs dbang phyug la phyag 'tshal/ /khyod kyis bdag rgyud byin brlabs nas/ /phyi nang bar chad zhi ba dang / /bsam don yid bzhin myur 'grub ste/ /dngos grub thams cad stsal du gsol/ /zhes pa rje nyid kyis mdzad pa 'di sbrel ba 'bum ther zhig kha ton du mdzad/ stag lo tshes pa na bla brang dkar por phebs te sku mtshams bcad rgya nges pa can la bzhugs pa'i ngang nas/ gnyer pa tshe 'dzin pa zhes bya ba dang / sprul sku ya ma legs pa 'jam dpal ba gnyis kyis/ dpal sa skya'i zur khang bla brang na bzhugs pa'i sku 'dra dkar shAkya grags kyis bzhengs shing / rje btsun nyid kyi phyag nas bzhugs pa de las sku'i dbyibs 'dra len zhus/ sku tshad kyi thig skud sogs spyan drangs te/ rgyu byin rlabs mdzad pa'i tshe nam mkha'i gtos thams cad 'ja'i dra bas khebs shing / me tog gi char kyang lhag par babs/ de nas rim bzhin