[A:343]sbrang rtsi nam mkha'i mtsho skyes nyid/ /nyid kyis ji skad rjes su gdams pa'i bka'/ /bka' bzhin bsgrubs na phan bde mtha' yas mod/ /mod la 'gyur ba dbyar gyi chu bzhin du/ /du mar snang ba bsod nams bgo skal zhan/ /'on kyang dus gsum sangs rgyas jo nang pa'i/ /gsung ni gzhon la 'doms pa yi ge'i tshul/ /'dis kyang re zhig bla ma'i 'phrin las rgyun/ /spel bar mdzad la rjes su yi rang bgyi/ /de nas bdag gi bla ma gcig tu dben pa la dgyes pa'i bsam gtan pa chen po 'di/ lo bcu bdun tsam gyi bar du/ dad gus kyi byed pa nam yang ma nyams pas dngos grub kyi rten 'brel rang 'grig tu gyur pa'i skal ba can bstan pa'i sbyin bdag chen po rtsis gnas gsar pas/ nye bar mkho ba ma tshang ba med cing gya nom pas bsnyen bkur te/ gtso bor skyid sbug bla brang / e waM bla brang dkar po/ bo dong rdzong la sogs par sku mtshams bcad rgya nges pa can kho na la bzhugs shing / de'i bar skabs bar skabs su gdul bya skal ba mchog tu gyur pa rnams kyi don yang ci rigs par mdzad de/ de'ang byi lo'i mjug dpal ldan sa skyar phebs nas sgo rum du nag po chen po'i drung du mchod gtor rgyas par phul zhing bstan pa rgyas pa'i 'phrin 'chol ba dang / skal ldan mang po la gsung gi bdud rtsi yang ci rigs pa stsal/ glang lo sbyin bdag chen pos spyan drangs te/ bo dong rdzong phun tshogs rab brtan du phebs nas sbyin bdag chen po yab sras la dpal nag po chen po'i man ngag thun mong ma yin pa'i khrid dang / yi ge'i lung la