[A:342]nas bstan pa ma nub tsam mdzad cing / bla brang tshogs khang sku 'bum mthong grol chen po la sogs pa'i zhig gsos phra rags dang / chos gzhis sogs kyi kha 'dzin rus su thon pa mdzad pas 'jig rten phyogs nas phyi thes su che ba byung la/ de ltar lo nyi shu rtsa drug gi bar ri khrod chen por kun mkhyen dus gsum sangs rgyas kyi bzhed pa ma 'khrul zhing / ma 'dres pa'i nges don gyi bstan pa gsal bar bzhugs pa ni/ bdag cag gi bla ma 'di nyid kyi sku drin kho na las byed po gzhan ma mchis par 'khums so/ /'khrul med sa chen bcu gnyis brnyes khyod kyis/ /gdul bya'i rten 'brel bcu gnyis sbyang ba'i phyir/ /gnas der lo grangs bcu gnyis rab bzhugs nas/ /kun rdzob dus sbyor bcu gnyis 'gog pa'i lam/ /rnal 'byor yan lag drug pa'i dga' ston gyis/ /skyon med khams drug ldan pa'i gdul bya rnams/ /rdul bral rigs drug rgyal ba'i sa la bkod/ /khams gsum 'gro drug skye sgo bcad pa bzhin/ /de tshe dpal ldan kA la pa yi grong / /bod yul 'dzin ma'i khyon 'dir 'phos pa bzhin/ /nges don chos kyi 'khor lo sgyur ba khyod/ /rigs ldan grags pa phyogs 'dir 'ongs sam snyam/ /'on te rnal 'byor dbang phyug dus 'khor zhabs/ /ngur smrig bla gos gsar pa bzung byas te/ /kha ba'i ljongs 'dir yud kyis 'ongs sam zhes/ /bdag gi sems ni khyogs la phyang mo yug /rgyal dbang nyin mor byed pa'i shul nyid du/ /gdan sa'i rgyu skar kha dog rab gsal yang / /nges don padma'i 'dzum zhal mi bzhad nas/ /nyams rtogs