[A:257]'dis sgor bas ni ma thub/ mtho sa zhig tu byon te gzigs pas pha rol po de dag dpung tshogs shin tu che zhing rngams par 'dug pas thugs cung zad skyo ba na/ bya rog chen po gnyis sku'i 'khris su babs byung ba la/ nag chung ba khyed tsho sdod pa e yin/ nga'i mi tsho mis sgor 'dug go zhes gsungs ma thag bya rog de gnyis 'phur song nas 'khrug pa'i steng gi nam mkha' la gshog skor 'ga' zhig byas pa na/ te ra pa'i ru sna la mdung dar dkar po zhig 'dug pa la rdo phog ste dum bur song ba tsam gyis de dag 'jigs shing skrag pas rang gnas su yud kyis bros nas gnod pa cung zad kyang byed ma nus pa sogs ngo mtshar ba'i gtam mang du snang zhing / byang chub kyi sems lhag par 'byongs pa'i stobs kyis nyam thag pa dang mgon med pa rnams la chos dang zang zing gi phan pa bsam gyis mi khyab pa mdzad/ khyad par dgung lo bcu gsum bzhes pa'i tshe/ lha sar sa skya skor chen gyi skor dpon la byon pa'i tshe/ chu bo ri na bod yul grub pa'i gtsug rgyan thang stong rgyal po bzhugs pa dang mjal/ skor dpon pa la zhus gsung nas chang gsol zhal chung ngu zhig gang gnang byung ba de snga chang gi dri tsam yang bdag gir mi mdzad kyang der the tshom med par gsol bas/ rten 'brel legs da dung zhus shig gsungs nas gsol phor bcu gsum gsol bas khyod kyis skor dpon lan bcu gsum byed par 'gyur ro zhes lung bstan pa ltar gdan sa chen po'i skor dpon lan bcu gsum gyi bar du mdzad de skye bo'i tshogs khri khrag du ma rnams kha ba can pa'i bsod nams kyi zhing gcig pu jo bo shAkya mu ne la sogs pa'i rten khyad par can rnams mthong ba