[A:332]shes par bya'o/ /de nas re zhig gdan sa chen po nyid du bzhugs te sde dang bstan pa'i khur bzhes/ rang nyid thos bsam sgom pa lhur mdzad la/ skal ba dang ldan pa du ma la so so'i bsam pa dang mthun pa'i chos kyi tshul du ma rgyun ma chad par gsungs/ nyid kyi dgung lo sum cu bzhes pa'i tshe/ ru lag grom pa rgyang gi bya 'dabs bkra shis gling zhes bya ba'i dgon pa zhig yod pa de'i dge 'dun rnams kyis spyan drangs nas lo bcu tsam zhig zhal bdag mdzad/ grwa pa rnams la rang rang gi skal ba dang mtsham pa'i slob sbyangs dpyis phyin par mdzad de/ phal che ba mkhas pa'i go 'phang la bkod kun rig gi cho ga'i skabs su/ tshugs chang dang skabs chang sogs chang kho na'i yo lang byed pa dang / cho ga'i rnam gzhag 'di yin cher med pa rnams bkag nas/ dge 'dun sder longs pa la chang 'grims sa med pa'i bca' sgrigs dang / cho ga'ang gzhan phan mtha' yas kyi steng nas phyag len shin tu zhib pa/ sngags kyi ring thung gcod mtshams tshun shin tu dag par bslabs shing 'dren pa'i tshe yang ring thung phyed pa'i phyir sgrigs 'don byed pa sogs bstan pa la phan pa'i srol bzang po tshugs te de'i phyag len gyi rgyun deng sang kyang yod par snang / mgon po'i bskang gso nam byed pa na nges par lug nag po re gsod pa sogs mu stegs byed dang cha 'dra ba'i lag len ngan pa thams cad rtsa ba nas bkag ste 'khrul med kyi phyag len dang mthun pa'i dgu gtor chag med btsugs grub chen bya 'gyur ba spyan drangs nas gsung ngag rin po che la sogs pa'i chos kyi 'khor lo rgya chen po skor bar gsol/ rang nyid kyis kyang gsung ngag rin po che tshogs bshad tshar gcig gsungs te dgon pa de'i dge 'dun