[A:329]khyab pa la dbu ma lugs kyi byang chub tu sems bskyed pa gsungs pa'i tshe/ lha rdzas kyi me tog dkar pos sa'i mdog bsgyur nus pa tsam nam mkha' nas lding zhing babs/ gsung snyan cing 'jebs la yid du 'ong ba des cho ga rnam par dag pa brda sprad pas der 'dus pa'i skye bo de dag byang chub sems dpa'i sdom pa rgyud ldan sha stag tu mdzad pas/ gzhi byes kyi skye bo der 'dus pa de dag bla na med pa'i byang chub tu nges par gyur cing / dad pa dang gus pa lhag par 'phel bas skal ba bzang por mdzad ces thos te/ rgyal ba'i yab gcig 'jam pa'i dbyangs khyod la/ /rgyal ba'i rtsa ba byang chub sems bskyed pa'i/ /rgyal ba'i myu gu de dag 'jig rten 'dir/ /rgyal ba'i mdzad pa mdzad la the tshom bral/ /yid 'phrog puNDa ri ka'i me tog gis/ /sa 'dzin zla shel bzhad ltar byas pa 'di/ /yid can de dag dkar po'i chos spyod pa'i/ /sa stegs mdzes zhes mtshon pa yin nam snyam/ /de'i skabs shig bdag cag gi bla ma 'di sne'u rdzong pas rang gi pho brang du spyan drangs/ bsnyen bkur rgya cher bsgrubs pa'i tshe/ phyags phyi zhig gzims gur bsrung ba la bzhag pa na khong yid bde bar gnyid du song ba'i bar la/ sil snyan hor chol bzang po zhig yod pa phyogs kyi rkun po zhig gis khyer bar gyur mod/ thog med rmongs pa'i mal stan 'jam po 'dir/ /dad rdzas gshin rdzas bcud kyis myos pa las/ /nyin mtshan med pa gti mug mig zum pa/ /kwa ye khyod las bden pa su zhig mchis/ /dre'u'i yab des lhug par blos btang mod/ /mod la srung ma pho nyar bcas pa 'khrugs/ /'khrugs ldan rkun po de yis