[A:327]nas dran/ /de nas rim gyis chos 'khor lha sa nyid du phyag phebs te/ skor ba sogs 'phel bar bzhugs pa na/ gzhis byes kyi skye bo kha cig 'thab rtsod cung zad la brten/ phan tshun rgyab snon res kyi 'khrug long du gyur/ gzhi pa kha cig gis brnyas pa byas pa na/ thugs cung zad 'khrug pa'i tshul bstan te/ mchod g.yog pa dge 'dun la gtor ma zhig bzos la der zhog gsung ba bzhin bsgrubs pas/ de ma thag phyogs thams cad mun par byed pa'i sprin nag ngams za ba 'jigs 'jigs ltar 'dug pa'i khrod nas glog gi phreng ba 'khyug cing / brdar ma rnams kyi klad pa 'gems par spro ba'i 'brug drag po dal ba med par sgrogs bzhin du/ phyogs de yud tsam la 'joms par nus pa'i ser ba drag po 'bab la nye ba na/ yul de'i ser bsrung des kho rang gi nus pa ji ltar yod pa'i thabs rnams kyis bzlog par 'dod kyang / cung zad kyang phan par mi nus pas rtab rtab por gyur te/ mgon gzhan ma rnyed par bdag gi bla ma 'di gang na bzhugs pa'i gzims gur gyi drung du lhags te/ ngal ba med par phyag brgya phrag mang po 'tshal zhing / gdong mchi ma dang bcas pas gsol ba btab pa na/ brtse ba chen pos dgongs te gtor ma de phul gsung / de phul ma thag sprin gyi tshogs de dag so sor gyes/ nam mkha' anda rnyil ltar sngo ba la nyi 'od kyis 'khyud pas skye bo rnams snying dga' bar byed pa zhig tu gyur zhes thos te/ khro ba spangs bzhin bdud la khro ba khyod/ /'khrugs pa med kyang snying rjes 'khrugs pa'i tshe/ /ma bsdus par yang