[A:318]kha cig ni skrag pas snying lkog mar bos/ gzu bor mi gnas pa'i hom can kha cig smod par 'dod bzhin du mngon sum la bsnyon par ma nus pas lkugs pa'i brtul zhugs la bkod/ skye bo phal mo che ni a la la chos rje sgo rum pa'i chos skyong bran du bkol ba'i nus mthu la ltos shig ces 'jigs shing skrag la mi phyed pa'i dad pa yang thob bzhin du rje 'di pa'i yon tan sgrog pa lhur len pa'i gtam gzhan smra ba'i go skabs kyang med par byas zhes thos te/ bstan pa'i bya ba mdzad pa rnams phar zhog /re zhig 'di tsam yang blo'i rwa ba las 'das pa ma yin nam/ 'di na 'jam dbyangs kyis kyang mi 'dul ba'i/ /bdud sde thal bar byed la chas pa khyod/ /mthu ldan rgyal ba'i dbang po gzhan su zhig /thugs rjes khro bo'i rol par bzhengs pa lags/ /gdul dka'i bdag 'dzin rtsad nas gzhom mkhas slad/ /gdul 'os bdud sde 'dul la bsnyems pa ci/ /gdul ba'i thabs la mkhas pa de dang des/ /gdul bya mtha' dag skyong ba 'di ngo mtshar/ /bo dong rdzong du gtor bzlog cig mdzad pa'i tshe gnas gsar nas sde pa brtan pa'i drung gis sgra gcan gdong dang / gza'i rgyu tshul sogs zhib tu brtsis nas de ga'i bshis tshul zhus pa na rang gi rnal 'byor med pa rnams la cho ga'ang khrigs ji lta bar byed dgos shing / phyi rol gyi sgra gcan sogs brtsi dgos pa yin gyi/ nang gi rnal 'byor yod pa la nang gi ltas kho na gtso bas de dang bstun nas byed pa las cho ga sgrigs dang gza' skar gyi spang blang mi 'tshal gsungs te/ rgyud gsum dregs pa'i snang brnyan ji snyed pa/ /gsal stong zung 'jug dbyings su mkhyen pa'i mthus/ /nang gi rgyud gsum dbang du 'dus pa'i phyir/ /phyi rol mtshan