[A:317]shing gnas dgos pa kho na byung la/ gtor ma gtong pa'i tshe gtor chen 'khyer pa por bskos pa de dang de dag shin tu 'jigs pas gtor ma la 'ju nus pa phar zhog phyogs su nye yang ma nus te/ /srid gsum bdud dpung 'joms pa'i dpa' chen po/ /snying rjes khros pa'i dmag dpung gtor ma'i zol/ /bdud kyi snying mar 'gems nus 'di 'dra la/ /'ju bar mi nus khyod las bden pa su/ /de'i tshe gsol dpon sangs shes zhes pa rje nyid la chos skyong gi rjes su gnang ba thob cing dad gus kyi skal ba bzang por gyur pa zhig yod pa des gtor chen khyer/ dpon slob rnams kyis chos skyong gi bskul mdzad de chas pa tsam gyis sngar bas kyang ches 'jigs shing skyi g.ya' ba'i cho 'phrul du ma zhig byung ba la brten gdan sa chen po na 'khod pa'i skye bo rgan gzhon ma mchis bar thams cad skrag cing skyi bung zhes byed nas khang pa'i nang du gnas kyang mi nus par gyur la/ thog mar gdong lhags shin tu che bas lam mi bgrod tsam byung ba la gtor ma 'degs yul de nyid du phebs te/ rje nyid kyi zor lam dbye ba'i gser skyem mdzad pa tsam gyis rlung chen po de yang skad cig la log nas rgyab nas 'gro zhing / gtor ma chen po de bdud thams cad kyi snying ga'i 'dzin mar brdabs pa'i tshe hom chen po sbar ba bzhin du me'i phung po 'tshub cing 'bar 'phro ba la sogs pa skye bo thams cad kyi snying 'dar bar byed pa'i cho 'phrul ston par mdzad la/ de'i mthus bdag chen thams cad mkhyen pa'i sku khams legs par dwangs shing gsung chos kyang mthar phyin pas shin tu mnyes shing / rje 'di la gtang rag gi gnang sbyin bsam gyis mi khyab pa mdzad/ rang mthong gis khengs pa'i mkhas grub khron pa'i rus sbal