[A:254]kha ba'i ljongs kyi yul gru thams cad kyi cod pan du gyur pa/ rje btsun rnal 'byor gyi dbang phyug birWa pas sku dngos su byon nas byin gyis brlabs shing / 'khrul med bstan pa'i mnga' bdag 'khon ston rim par byon pa rnams kyis bdag gir mdzad cing nye bar bskyangs pas 'dzam bu'i gling gi chos dang zang zing gi dge legs thams cad 'du zhing 'byung ba'i sgo gcig pu/ bde bar gshegs pa'i gsung rab mdo sde dang rgyud sde mtha' dag gi chos kyi sgra rgyun mi 'chad pa sgrog pa'i gtsug lag khang chen po dpal ldan sa skya zhes 'jig rten na nyi zla ltar grags pa de nyid kyi bya 'dabs las ha cang mi ring ba/ skyes bu skad kyi gsang mtho zhing lus kyi stobs rtsal phul du byung ba mang po 'byung ba'i gnas dpa' lung zhes bya ba'i yul gyi snying po dam pa mang pos rab tu bsngags shing byin gyis brlabs pa/ dpal rdo rje nag po chen po che chung gis nye bar bsten cing yongs su skyong ba'i gtsug lag khang / chos kyi rgyal po 'phags pa rin po che la sogs pa'i bla ma dam pa rnams dang / rgya hor gyi rgyal po la sogs pa 'jig rten na che bar rlom pa mtha' dag gis bstan pa spyi'i mchod gnas su mnga' gsol ba'i dpa' lung dgon pa zhes bya ba yin no/ /tshad ldan dam pa mang pos ring nas bsngags/ /mthu ldan srung ma'i dbang pos yongs su brten/ /rtsal ldan skye bo du mas gang ba'i grong / /chos ldan dge 'dun 'du ba'i gtsug lag khang / /'di ni rje btsun khyed kyi bltams pa'i yul/ /yul dbus ser skya'i grong khyer khyad par ci/ /ci phyir lhar bcas 'jig rten kun gyi skyabs/ /skyabs mchog 'khrungs pa'i gnas su mtshungs phyir ro/ /'di'i rigs ni/ mnga' bdag mar pa lho brag pa chen po'i thugs sras ka chen bzhi'i nang tshan/ 'od gsal gyi bka' babs pa'i gtsang rong gi mes ston chen po zhes bya ba/