[A:253]pos gdul bya so so'i bsam pa dang dbang po dang khams dang bag la nyal dang rjes su mthun par gang la gang 'dul ba'i rnam par 'phrul pa mtha' yas pa skad cig skad cig la spro bar mdzad pa'i phyir/ de dag gi tshul ni 'di tsam mo zhes sa bcu'i dbang phyug chen po rnams kyi'ang blo'i spyod yul du gyur pa ma yin na byis pa so so'i skye bo rnams kyis bsam par bya ba tsam yang ci zhig nus/ de bas na dam pa 'di'i rnam par thar pa mtha' dag ni bdag lta bu'i blun pos smra bar ga la spobs/ 'on kyang bdag cag la sogs pa'i sems can skal ba dman pa mtha' dag rjes su bzung ba'i slad du tha mal pa'i dge ba'i bshes gnyen gyi tshul bzung nas dus 'dir bde bar gshegs pa'i bstan pa dang 'gro ba mang po'i don mdzad pa'i tshul mdo tsam zhig brjod pa la spro bar gyur to/ /sangs rgyas kun gyi mkhyen pas gzhal dka' ba'i/ /'gro rnams dga' bskyed bgrang yas yon tan tshogs/ /legs byas de dang de ni sa bcu pa'i/ /dbang po rnams kyi'ang blo yi spyod yul min/ /dam pa'i yon tan yid bzhin rin chen mtsho/ /byis blo'i ri bong rkyal gyis ci zhig rtogs/ /'on kyang rang rang blo la snang ba'i tshul/ /cung zad brjod pa'ang dpag yas phan bde'i rgyu/ /de la bdag cag gi dpal ldan bla ma dam pa dmigs pa med pa'i thugs rje chen po dang ldan pa 'di 'khrungs pa'i yul ni/ de bzhin gshegs pa mngon par byang chub pa'i gnas rdo rje gdan nas byang phyogs su dpag tshad brgya bsgrod pa/ chu bo lo hi ta dal gyis 'bab pa'i lho/ rab dkar gangs ri'i phreng bas kun nas bskor zhing sa gzhi dung dang kunda ltar dkar zhing shin tu snum pa/ chu bo'i 'phreng bas g.yas su bskor te dal gyis 'bab pa la sogs pa bkra shis dang dge mtshan du mas brgyan pas