[A:255] dpal gsang ba 'dus pa la sogs pa'i rgyud sde mtha' dag gi gsang ba 'dzin cing / rim pa gnyis kyi rnal 'byor la brtan pa thob pas zhag mang por 'od gsal la rtse gcig tu g.yel ba med par bzhugs pa dang / bar do'i sems can dpag tu med pa grol bar mdzad pa sogs ngo mtshar ba'i mdzad pa brjod kyis mi lang ba mnga' ba de nyid nas rim bzhin brgyud de/ chos kyi rje dkon mchog rgyal mtshan pa zhes bya ba/ chos kyi rgyal po 'phags pa rin po che'i mchod g.yog yun ring du mdzad/ de nyid dang / shar gling pa rgyal mtshan bzang po la sogs pa dam pa du ma bsten nas lung rtogs kyi yon tan du mas rgyud mdzes par mdzad cing / sgo rum gyi gzims khang zhig tu dpal rdo rje nag po chen po gur gyi mgon po la bsnyen pa mdzad pas grub pa'i mtshan ma mang du thob/ khyad par mthu stobs kyi dbang phyug gdong bzhi pa ma bsgrubs bzhin du mngon sum du zhal ston 'dod pa'i dngos grub bstsal ba na/ rdo rje 'chang thugs ma zhes bya ba'i bstod pa yang mdzad/ de lta bu de sgo rum gyi gdan sa mdzad bzhin pa'i ngang nas dben dgon gyi tshul du dpal lung gi dgon pa btab/ de'i mgon khang du mgon po'i 'bur sku zhig mdzad pa'i rab gnas kyi tshe/ skyed lhas phyogs nas thod pa rdzas sna tshogs kyis phyur bur gang ba zhig nam mkha' la bya 'phur ba bzhin byung ste/ lder sku la thim par skye bo mang pos mngon sum du mthong ba dang / dpal lung dang / skyed lhas kyi bar la rkang rjes mda' gang tsam gyi tshad dang ldan pa spang sogs kyi ldebs la lcags bsregs rgyab pa bzhin du gsal ba sogs mgon po dngos su byon pa'i cho 'phrul 'jigs su rung ba du ma ston par mdzad pa de nas bzung ste/ dpal sgo rum gyi gtsug lag khang chen po dang / dpal lung dgon gzhis dang bcas pa stabs gcig tu bzung