[A:306]med bzhin snang ba'i kun brtags 'khor ba'i chos/ /rang sems gcig pu'i rtsal du thugs chud nas/ /kun tu rtogs pa'i chu 'dzin phreng ba yang / /gsal stong bskyed rim nam mkha'i dbyings su yal/ /gya nom lha skur zhen pa'i rnam rtog dug /'od gsal bde chen bdud rtsi'i bcud du bsgyur/ /rnam gsum dgra las rgyal ba'i dpa' bo khyod/ /'khor bas 'jigs pa kun gyi skyabs su nges/ /dngos kun rgyal ba'i dkyil 'khor chu zla'i gar/ /de yang dga' chen blo 'das chos dbyings su/ /legs par rtogs bzhin lam gyi 'bad rtsol gyis/ /gsang chen bstan pa spel ba 'di ngo mtshar/ /de ltar zab mo'i lam rdo rje 'chang nas zam ma chad pa'i brgyud pa rnam par dag pa las 'ongs pa byin rlabs kyi na bun ma yal zhing / dam nyams dang 'dres khyer gyi ma bslad pa tshad ma gsum mam/ bzhi dang ldan pa'i lam dgyes bzhin du thugs nyams su bzhes pa las grub pa gnyis kyi 'bras bu du ma zhig mngon du yod mod/ de'i tshul cung zad bsnyad na dgung lo bcu dgu bzhes pa'i tshe khyod hor zla drug pa la 'chi ba yod zer ba'i lung bstan zhig byung na'ang skye 'chi'i 'jigs pa las ring du song ba'i phyir thugs mi bde ba tsam yang ma byung zhing de bzlog pa'i thabs sogs kyang ma mdzad par cung zad song ba na sku 'khor rnams kyi dgongs pa bzhin ma byung ba zhig la zhal bkod cig mdzad de/ 'di bzhin gyis khyed rang tsho la dgos bsam nga rang yun ring zhig sdod pa'i 'phros mi 'dug gsungs pas/ der 'dus pa thams cad rtab rtab por gyur/ khyad par rje btsun yab kyis nged cag mgon med pa 'di rnams yal bar 'dor ba rigs sam zhes nan tan du gsol ba btab pa'i ngor tshe sgrub