[A:305]gsung bcad kho na'i ngang nas mdzad pa yin no/ /mdor na thugs dam gyi rim pa de dag kyang zhabs rdul ring nyer brten pa'i rje btsun dbon rin po ches yi ger mdzad 'dug pa dang / bdag rang gi'ang cung zad nges pa rnams 'ol spyi tsam du bris par zad kyis/ yang dag pa na rje btsun dam pa 'di'i thugs kyi dgongs pa'i mtha' su zhig gis rtogs par nus te/ bsam gyis mi khyab ye shes can/ /de yi mkhyen pa dpag mi nus/ /zhes gsungs pa nyid don la gnas pa'i phyir ro/ /dus phyis shing pho byi lo rje bla ma'i phyag dpe rnying pa 'ga' zhig lag tu son pa'i khrod na phyag bris dngos kyi sa mo lug gi hor zla bdun pa'i tshes nyi shus sa ya gcig song / de'i nyer gcig nas bzung ste khri re bzla ba'i ring nye bcas zhes dang / sa ya gnyis/ sa ya gsum/ sa ya bzhi/ zhes bris pa zhig mthong / sngags gang yin su zhig gis shes/ grangs tshad ni blo las 'das pa zhig 'dug go /des na skye bo blo chung ba rnams drang pa'i phyir dang / thabs bsod nams kyi tshogs spel ba'i rgyun mi nyams pa'i phyir spros bcas kyi rim pa de tsam zhig mdzad par bstan gyi/ gtso bor ni dus dang rnam pa kun tu gdan bzhes dang / gdul bya thun mong ba rnams la chos gsung ba'i bar ma gtogs pa/ mun khang kho na brten nas rnam pa thams cad kyi mchog dang ldan pa'i stong pa nyid kyi gzugs dang / de las skyes pa'i mi 'gyur ba'i bde ba chen po gnyis ro gcig tu 'dres pa'i brjod bral phyag rgya chen po'i ngang du mnyam par 'jog pa kho nas dus 'da' zhing spros bcas de dag spros bral de ga'i ngang nas 'dzin med du khral khral mdzad par mngon no/ /