[A:293]dang / mkhas pa'i dbang po dkon mchog tshul khrims las dbu sems gnyis ka'i lugs te yang dag par blang ba brda las byung ba'i smon 'jug gi sems bskyed pa legs par nos te/ byang chub sems dpa'i spyod pa la 'jug pa dang / bslab pa kun las btus pa dang / sdom pa nyi shu pa la sogs byang chub sems dpa'i sde snod mtha' dag la legs par sbyangs nas/ ltung ba dang / ltung ba med pa dang / ltung ba'i gzugs can dang / ltung ba med pa'i gzugs can la sogs pa ma nor bar mkhyen pa dang / dge ba'i bshes gnyen la rtag tu gus pa dang / dkon mchog gsum gyi gdung rgyun mi 'chad pa'i slad du brtson pa/ sems can thams cad la phan par bzhed pa'i thugs rgyun du mnga' ba/ nag po'i chos bzhi dang bral zhing / skyes bu chen po'i rtog pa lnga dang nam yang mi 'bral bas/ byang sems kyi rtsa ba'i ltung ba dang / nyes byas phra zhing phra bas ma gos bzhin du yang phung po gsum pa la sogs pa'i bshags bsdams dang / rten gyi spyan sngar nyin re bzhin sems bskyed rgyas par len la/ dus thams cad du rang don yid byed kyi dri ma dang bral zhing / gzhan la phan pa lhur len pas sku 'khor dang / slob ma dang / sbyin bdag la sogs pa thams cad kyang rang rang gi skal ba dang 'tsham pa'i thabs sna tshogs kyi sgo nas dge ba'i bya ba gnas skabs dang mthar thug gi don yod pa 'ba' zhig la sbyor ba mdzad kyi/ don med pa dang / don log pa la cung zad sbyar bar mi mdzad la/ tha na dge bshes sam/ mi chen nam/ skye bo phal pa lta bu dang gsung gleng zhig mdzad na yang / rgya