[A:294]bod du byon pa'i mkhas grub gong ma rnams gnas gang du 'khrungs pa/ de dag gi yon tan gyi khyad par/ bstan pa rin po che la bya ba ji ltar mdzad pa/ de dag gi bshad sgrub kyi srol 'dzin pa ji ltar byung ba/ da lta ji ltar gnas pa'i tshul lam/ yang na ni dkon mchog gsum gyi rten bzhengs pa dang / rnying pa rnams gsos pa dang / de dag la mchod pa byas pa'i phan yon la sogs pa chos kyi gsung gleng kho nas de dag gi rgyud dge ba la ma dad pa rnams dad pa dang / dad pa rnams 'phel ba dang / 'phel ba rnams brtan par mdzad pa yin gyi/ mi dge ba dang / lung ma bstan gsung ba mi dran la/ lhag par byams pa dang / snying rje bsam gyis mi khyab pa'i dbang gis/ grwa pa dang / sbyin bdag /sku nye sku 'khor la sogs pa rnams kyi nang nas kyang gang dag zas gos kyi 'phongs pa dang / spyod pa ngan pa/ chos dang mi mthun pa/ 'jig rten gyi bya ba nyes pa/ mi sdang ba/ mgon skyabs med pa rnams dang / khyad par rje nyid la ma gus pa/ skur pa 'debs shing / log sgrub sgo du ma nas byed pa rnams la lhag par yang thugs brtse bar mdzad cing / gzhan tsho la mgon skyabs byed pa de rang sa na gda' ste/ sdug ge 'di tsho la mgon skyabs gzhan med pa gsung nas zas gos kyi gnang byin mdzad/ sku mdun du bos shing snyan pa'i gsung gis gzengs bstod/ dbugs phyung / kho rang gi yid la re ba gang yod sgrub/ tha na gzhan la bcol gtam tshun chod kyis phan ci thogs mdzad pa yin te/ dper na jo gdan kun snying zhes bya ba kun spyod shin tu ngan pa brtse bas skyong mkhan rje nyid las gzhan su yang med bzhin du skur zhus dang zhabs 'dren kho na la chas pa zhig yod pa de la bu gcig pa ltar shin tu byams shing /