[A:292]de dag gyi na'i zas skom 'tshol 'tshol nas/ /yid bzhin nor bu bor dang mtshungs sam snyam/ /khyod kyis sku srog las kyang so thar dang / /de las rdo rje theg pa gces dgongs nas/ /ma nor spangs blangs tshul bzhin mdzad pa 'dis/ /rgyal ba dgyes pa'i lam bzang gsal bar byas/ /skad snyan ngang mo rol pa'i 'phur lding gis/ /chu gter padma'i 'phreng bas mdzes par go /yid 'ong tha grur khyab pa'i dri bsung 'di'i/ /tshul khrims mchog tu blun po yis kyang rtogs/ /'dul ba'i gzhung dang rgyud sde rgya mtsho'i don/ /tshul bzhin gzigs la 'khrul pa ci zhig mnga'/ /thos chung 'ga' yis 'di dang 'di 'dra zhes/ /smad kyang rang gi de nyid bstan par zad/ /rnyog bral kun nas gtsang ba'i tshul khrims ldan/ /'gro rnams dga' byed zhi dul spyod pas mdzes/ /khengs bral legs par 'doms pa'i brtul zhugs can/ /lnga brgya'i dus kyi dgra bcom 'di ngo mtshar/ /de ltar nges par 'byung ba'i tshul khrims kyis mdzes par byas pa tsam du ma zad kyis/ /bdag gi bla ma byang chub sems dpa'i spyod pa lhur mdzad 'dis/ bskal pa dpag tu med pa'i sngon rol nas byang chub tu thugs bskyed cing de'i bslab par bya ba mtha' dag la zhum pa dang / sgyid lug pa dang / 'khor bas skrag pa med cing / rang smin pa'i gegs gsum dang / gzhan smin pa'i gegs lnga la sogs pa dang bral bas tshul ji lta bar spyod bzhin pa yin mod kyis/ sku tshe 'dir yang bdag chen rdo rje 'chang chen po'i zhal snga nas yab sras las maNDal tshom bu lnga pa la bsten pa'i sems bskyed dang / rnal 'byor dbang phyug bsod nams seng ge las theg pa chen po dbu ma'i lugs