[A:291]shin tu gces dgongs nas/ skabs 'gar bskyed rdzogs kyi ting nge 'dzin la yun ring du 'byams pa la sogs pa'i tshe/ gsol ba gdan gcig po de nyi ma nub kha dang sa sribs 'tshams sogs su yang bzhes pa mthong zhing / gsung las kyang / nga rang la snga dro zos pa dang / phyi dro zos pa la khyad cher mi 'dug kyang gung tshigs ma yol tsam byung na bstan pa'i mig ltos la phan pa tsam 'dug ste/ kha don mi tshar ba 'dug gsung nas thugs dam la gnod na nyan thos kyi bslab pa phra mo'i blang dor yang btang snyoms su mdzad na gzhan zir long mang po rgyang du bsring ba smos ci 'tshal/ 'di ni rgyud sde dri ma med pa nas bshad pa dang / slob dpon birWa pa la sogs pa'i rnal 'byor gyi dbang phyug 'khrul pa med pa rnams kyis mdzad pa dang rjes su mthun pas shin tu ngo mtshar ba'i mdzad pa yin la/ de la brten nas tshul khrims kyi dri bsung phun sum tshogs pa thos pa tsam gyis yid tshim par byed pas na bza' dang / gang du bzhugs pa'i gnas khang thams cad khyab cing mdzes par zhabs drung du 'ongs pa'i skye bo sna'i dbang po yod pa thams cad kyi spyod yul du gyur pa de yin mod/ na bza' la sogs pa la ni deng sang gi bar du yang tshul khrims kyi dri bsung yid 'phrog pa de ma nyams par gnas pa 'di yin no/ /la la theg dman khyad gsad ham gtam gyis/ /phra rags bslab pa dral bas grol bar 'dod/ /de dag 'khyags pa'i steng gnas khang bzang bzhin/ /mthon por rloms kyang dma' bar lhung gis dogs/ /'ga' zhig theg pa dman la dam 'chel bas/ /mchog gi lam la mos pa'ang mi rnyed pas/ /