[A:279]pa jo nang 'gyur la/ kun mkhyen chen po'i sa bcad dang bcas pa/ brtag gnyis kyi 'grel pa rdo rje snying pos mdzad pa/ dpal phyag na rdo rjes mdzad pa'i bde mchog stod 'grel/ kun mkhyen chen pos mdzad pa'i dus 'khor gyi sgrub thabs dpag bsam snye ma/ dkyil chog ye shes rgya mtsho dang ye shes chu rgyun/ sbyin sreg nang gi mun sel/ sbyor ba yan lag drug pa'i yi ge chos rje phyogs rgyal bas mdzad pa rnams kyang gsan no/ /de nas bdag cag gi bla ma rang nyid 'khor ba'i chu bo las ring du bsgal zhing / gzhan dag kyang sgrol ba la gcig tu dgongs pa 'di'i thugs la sangs rgyas kyi bstan pa la zhugs la ma rdzogs pa ni byis pa mig mchi mas gang ba dang 'dra zhing / so sor thar pa'i las sgrub pa dang las kyi cho ga la mi dbang / de la mi dbang na gsang sngags kyi rgyud ston pa po dang / dbang bskur ba'i rdo rje slob dpon khyad par can du cung mi 'gyur bar mkhyen nas/ nyid kyi dgung lo nyi shu bzhes pa me pho 'brug gi lo'i hor zla dang po cho 'phrul chen po bstan pa'i zla ba'i yar ngo'i tshes bco lnga'i mtshan mo'i cha la dpal ldan sa skya'i gtsug lag khang chen po'i snying por gyur pa sgo rum chos kyi pho brang du rgyal ba rdo rje 'chang chen po kun dga' bzang po'i zhabs stegs kyi seng ge'i khri la bzhugs pa'i yongs 'dzin dam pa dkon cog 'phel ba'i zhal snga nas kyi mkhan po mdzad/ bde bar gshegs pa'i ring lugs mtha' dag la mi 'jigs pa'i spobs pa can 'jam pa'i dbyangs glo bo mkhan chen bsod nams lhun grub legs pa'i 'byung gnas rgyal mtshan dpal bzang pos las kyi slob dpon/ chos kyi rje zur khang pa