[A:267]gnyis su med pa'i bdag nyid can mtshon byed dpe'i ye shes phyin ci ma log pa thugs la 'khrungs/ zab mo lus kyi dkyil 'khor du grol byed lam gyi dbang / rje btsun bdag med ma'i dbang bzhi yongs su rdzogs pa dang / byin rlabs kyi brgyud pa ma nyams pa rnams sngon du 'gro ba'i gzhung ji lta ba bzhin bkri ba'i khr-id yongs su rdzogs pa nyams khrid du gsan nas/ de dang rjes su 'brel ba'i bla ma brgyud pa'i rnam par thar pa ngo mtshar snang ba/ glegs bam pod dmar ma'i phal che ba rnams kyi lung / lam sbas bshad kyi khrid/ lam zab mo bla ma'i rnal 'byor gyi byin rlabs/ rnam 'joms bir lugs kyi byin rlabs rnams dang / sems dpa' chen po mus pas mdzad pa'i mngon rtogs yan lag drug pa la bshad pa phyag khrid dang bcas pa/ gzhal yas khang mngon byang rgyas btab/ bdud rtsi byin rlabs bdud rtsi ril bu sgrub pa/ rdo rje dril bu'i rnam bshad/ rtsa ltung gi 'grel pa rnams chos kyi rgyal po nyid kyis mdzad pa'i lung / rje btsun chen pos mdzad pa'i tshogs 'khor 'bring po/ rtsa ltung 'khrul spong / he ru ka'i chas drug gi bshad pa rnams gsan zhing / de ltar dbang gi chu bo ma nub pa sogs snyan brgyud bzhis gdams shing nyams myong tshad ma phyin ci ma log pa thugs la 'khrungs pas tshad ma bzhi dang ldan par gyur/ sku'i skye ba 'di'i thugs dam zab mo yang chos kyi rgyal po 'di nyid la rgyu dbang gsan pa'i tshe 'khrungs pa'i don gyis bla ma thams cad kyi nang nas mchog tu 'dzin zhing mi phyed pa'i dad pa brtan po mnga' bas mtshan brjod pa'i tshe yang spyan chab 'byin pa dang /