[A:266]kyis mdzad pa'i mdo rtsa'i TIkka dang / 'dul ba'i bslab bya rgyas pa rnams gsan te/ blang dor gyi gnas la mkhas pa'i phul du phyin par mdzad la/ chos grwa de'i mkhan po paN chen bsod nams ye shes las kyang gong du smos pa de dag phal cher gsan pa yin no/ /de nas dgung lo bcu drug bzhes pa'i tshe chos rje kun dga' rgya mtsho ba zhing gzhan du gshegs pa'i dbang gis slar gdan sa chen por phebs te dgongs pa rdzogs thabs kyi gsol 'debs phun sum tshogs pa sgrub pa'i zhal bkod mdzad cing dam pa de'i rgyal tshab tu bdag chen rdo rje 'chang chen po'i bka' dang / dad dang skal bar ldan pa'i grwa pa sbyin bdag rnams kyis gsol ba btab pa'i dbang gis zhal gyis bzhes shing / lugs gnyis nas sde dang bstan pa'i bya ba bsam gyis mi khyab pa sgrub par mdzad pa yin no/ /dgung lo bcu bdun bzhes pa'i tshe bdag chen chos kyi rgyal po skyed lhas pa chen po'i zhal snga nas kyi zhabs drung du nye bar bsnyen nas dus gsum gyi rgyal ba sras dang bcas pa thams cad kyi bgrod pa gcig pa'i lam po che bde bar gshegs pa'i gsung rab mdo rgyud thams cad kyi don gyi bcud dbyung ba'i man ngag gi nying khu slob dpon rnal 'byor gyi dbang phyug dpal ldan birWa pa'i gsung gi man ngag rje btsun sa skya pa yab sras rnams la snyan brgyud bzhi bar ma chad par byon pa'i gsung ngag rin po che lam 'bras bu dang bcas pa'i man ngag gi sku drin nod par mdzad de/ de yang thog mar snang ba gsum gyi 'khrid rdzogs pa'i rjes su maNDal tshom bu lnga pa la brten pa'i sems bskyed/ dbang gi mngon par rtogs pa bdun tshang ba'i sgo nas rdul tshon gyi dkyil 'khor smin byed kyi dbang bskur ba nas/ de'i tshe dbang gi ye shes phab pa'i dus bde stong