[A:268] zla ba byung ngo cog gi tshes bzhi mchod pa la dpal kye rdo rje'am gsang ba 'dus pa 'jam pa'i rdo rje'i dkyil 'khor sgrub cing mchod pa rgyas par mdzad la/ dus rgyun du yang sku 'dra'i drung du mchod pa gya nom pa bshams nas gus pa'i phyag dang maNDal sngon du 'gro ba'i yan lag bdun pa rgyas pa nam yang 'chag pa'i skabs med la/ nang ting nge 'dzin gyi mchod pa rgya chen po yang rgyun du 'bul bar mdzad pa yin no/ /zab gsal blo gros gter chen 'jam pa'i dbyangs/ /ngur smrig rgyal mtshan pa yi sku bstan nas/ /'khrul med dpal ldan sa skya'i rje btsun gyis/ /rnam dkar bzang po'i 'phrin las rgyas mdzad de/ /khyod kyi kun gzhi phung khams skye mched la/ /zag med dga' bzhi'i dbang chog legs bskur nas/ /mi 'phrog sku bzhi'i sa bon smin pa'i 'bras/ /rgya chen don gnyis lhun grub 'di ngo mtshar/ /gzhan yang chos kyi rgyal po de nyid las rje btsun bcom ldan 'das ma rig byed ma'i rjes gnang thun mong dang thun mong ma yin pa/ kag chol 'dod pa'i rgyal po/ tshogs bdag bgegs kyi rgyal po phyag bcu gnyis pa rnams kyi rjes su gnang ba/ thun mong dang thun mong ma yin pa'i man ngag yi ge'i rigs yongs su rdzogs pa'i lung dang bcas pa gsan zhing / 'di rnams sa skya pa rang gi thun mong gi dngos grub bsgrub pa'i man ngag gi nying khu yin pas nyams su long zhig ces rjes su gdams pa yang mdzad gsung / de bzhin du dpal rdo rje nag po chen po gur gyi mgon po lha brgyad kyi rjes su gnang ba thun mong dang thun mong min pa pu tra ming sring gi