[A:265] gzhan yang 'jam dbyangs a ra pa tsa na/ spyan ras gzigs skyer sgang pa'i lugs/ phyag na rdo rje u tsarYa/ sgrol ma sngo ljang rnams kyi rjes su gnang ba dang / sgrol ma'i gzungs/ phyag 'tshal nyi shu rtsa gcig pa la sogs pa lha de dag dang rjes su 'brel ba'i yi ge phra mo rnams kyi lung / theg chen chos kyi rgyal po'i bka' 'bum las nye bar mkho ba 'ga' zhig sogs chos kyi rnam grangs mang po zhig gsan par mdzad/ dgung lo bcu gsum pa la sde snod kyi chos la thos bsam mdzad par bzhed nas bdag chen rdo rje 'chang chen po'i drung du byin rlabs zhu ba la byon pa'i tshe gzims khang dmar mo la zhig gsos mdzad pa'i ka ba btsugs ka dar btags pa tsam dang thug pas chos kyi rgyal po'i gsung gis rten 'brel bzang / khyod la sangs rgyas kyi bstan pa'i ka ba tshugs pa zhig 'byung zhes lung bstan thob par dgyes bzhin du dpal bo dong e'i chos grar phebs te byang chub sems dpa' sems dpa' chen po dpal ldan rin chen zhes bya ba mnyes par mdzad/ de nas lo gsum gyi bar du 'jad kyi me lung dgon pa dang / shangs la sogs pa chos gzhi gar phebs kyi rjes su 'brangs nas tshad ma bsdus pa la mkhas par sbyangs/ shes rab kyi pha rol tu phyin pa'i man ngag gi bstan bcos mngon par rtogs pa'i rgyan 'grel pa don gsal dang bcas pa'i TIkka kun mkhyen nam mkha' bsod nams kyi gsung sgros ma'i steng nas bshad pa rdzogs pa dang / spyi'i don dang / dka' ba'i gnad kyi bshad pa mtha' dag kyang legs par gsan zhing sbyangs nas thugs su chud par mdzad/ 'jam pa'i dbyangs dkon mchog bzang pos mdzad pa'i TIkka'i steng nas sdom pa gsum gyi rab tu dbye ba'i bshad pa dang / kun mkhyen nam bsod