[A:264]don mthun mtshan dang lhan cig tu/ /mang po'i mkhan por 'gyur ba'i lung bstan thob/ /skyon brgyas phyug pa'i 'khor ba'i khyim thabs gang / /de rgyu bag chags bcas pa ma lus pa/ /spangs nas ring mo zhig tu lon kyang slar/ /rab tu 'byung ba'i rnam rol 'di ngo mtshar/ /gzhan yang bdag cag gi mkhan po gzhal du med pa'i yon tan la mnga' 'byor ba 'di ni nges par chos thams cad kyi dbang phyug chen po nyid du lhun gyis grub pa yin mod kyi byis pa rnams gzhug pa'i slad du bslab sbyangs kyi tshul ston par mdzad de mtshan nyid dang ldan pa'i bshes gnyen du ma zhig mnyes par mdzad nas zab pa dang rgya che ba'i dam pa'i chos bsam gyis mi khyab pa zhig gsan cing thugs su chud par mdzad pa las thog mar rang gi khu bo rnal 'byor gyi dbang phyug las yon tan thams cad kyi gzhi klog bslab par mdzad pa'i tshe/ chos rje des ka kha tshar gcig gsungs pa tsam gyis thugs su chud cing klog yig thams cad tshegs med du bde blag tu mkhyen/ dgung lo bcu gcig bzhes pa'i tshe slob dpon bstan pa dar ba la dpal sa skya'i shar gling na bzhugs pa'i drung du brten te/ dpal ldan bla ma dam pas mdzad pa'i dpal kye rdo rje'i mngon par rtogs pa yan lag drug pa/ dkyil 'khor bdun bsres chos rje dpal ldan tshul khrims pas mdzad pa/ chos kyi rgyal po 'phags pas dbang chu dang / paN chen ma tis mdzad pa'i sbyin sreg rnams gung bsgrigs pa'i sgrub mchod rgyas pa'i phyag 'khrid dang / theg chen chos kyi rgyal pos mdzad pa'i kun rig gi cho ga gzhan phan snye ma dang / rab tu gnas pa'i cho ga don gsal la phyag 'khrid mdzad de tshig don thams cad thugs su tshud/ sa skya zur khang pa chos kyi rje dpal ldan rin chen gyi drung du theg chen chos kyi rgyal pos mdzad pa'i dpal kye rdo rje'i rtsa rgyud brtag pa gnyis pa'i TI ka dag ldan snye ma dang / de'i dka' 'grel snye ma'i steng nas bshad bka' rdzogs par gsan zhing tshig dang don la rgol bas mi brdzi ba'i spobs pa thob/