[A:262]yongs su rdzogs par nos te/ phung khams skye mched dang po'i dbang gis smin par mdzad/ gzhan yang chos rje sku mched de gnyis las tshe dpag med lha dgu/ sgrol dkar/ phyag na rdo rje u tsArYa rnal 'byor dbang phyug gi byin rlabs/ mgon po lcam dral gyi rjes gnang sogs du ma zhig gsan par mdzad de/ de ltar bdag cag gi bla ma dam pa 'di byis pa chung ngu'i dus nyid nas kha na ma tho ba mtha' dag ni ring du spangs/ rnyog pa med cing gtsang ba'i kun tu spyod pas ni 'khyud pa bzhin/ dge ba'i bshes kyi mgon dang bcas pas dam pa'i chos kyi bya ba rnams la ngal ba med cing brtson la spro ba dang bcas bzhin pa'i ngang nas dgung lo bcu bzhes pa'i tshe/ yab dang lhan cig tu dus gsum gyi rgyal ba ma lus pa'i yab rje btsun 'jam pa'i dbyangs nyid kha ba'i ljongs 'dir snying po'i bstan pa spel ba'i phyir/ rdo rje 'dzin pa'i ded dpon gyi rnam par 'phrul pa rje btsun brtse ba chen po snying po'i zhabs nyid snyigs ma'i dus kyi 'gro ba rnams la rjes su brtse bas slar yang byon pa bdag chen rdo rje 'chang chen po blo gros rgyal mtshan dpal bzang po'i zhal snga nas kyi drung du phyag 'bul la byon pa na/ dam pa de'i gsung gis yab la byis pa 'di btsun pa mi byed pa e yin gsung pa la btsun pa byed pa'i khungs yin zhus pa na de ga shin tu legs zhes gza' skar bzang po zhig yod 'dug pas de nyin rang rab byung grub pa gyis phebs pa gsan ma thag skye ba du mar sdug bsngal gyi rtsa bar gyur pa'i 'khor ba'i khyim thab dug bzhin du rgyang du bsrings te/ rnyog pa med pa'i tshul khrims kyis mdzes pa'i bag chags nye