[A:261]zhes bya bar gsol to/ /zab rgyas dam pa'i chos kyi mdzod bzung nas/ /snyigs ma'i dus 'dir thub bstan skyong mdzad cing / /mgon med skye bo mang po'i skyabs gcig por/ /'gyur bar nges nas mtshan 'di btags sam snyam/ /cung zad mno rnyed pa nas sngon nas yun ring du goms pa'i legs byas kyi sa bon brtas pa'i mthus tha mal pa'i byis pa'i spyod pa las 'das te/ phal cher ting nge 'dzin 'ba' zhig gis dus 'da' ba dang / gsung gi thog mar ngas chos bshad kyi khyed rang kun nyon cig ces gsungs la/ rtsed mo'i gnas skabs na yang nga chos rje byed pa yin gsungs nas gdan mthon po la bzhugs te chos 'chad pa'i rnam 'gyur dang / rten gsum dang gtsug lag khang bzhengs pa sogs skyes bu dam pa'i spyod pa zhi ba dang dul ba dang bag yod pas dus 'da' bar mdzad cing / gos la sogs pa gtsang ba dang / lus la srin bu rnams mi 'byung / zhes sbyor lam rtse mo la gnas pa'i rtags su bshad pa dang mthun par gtsang sbra che zhing srin bu mi 'byung ba la sogs pa mdor na gzhon nu nyid nas dam pa'i go 'phang mngon du mdzad pa'i dge mtshan gyis sku 'khor na gnas pa kun kyang 'di la ni nges par chos kyi rje chen po zhig 'byung ngo zhes snyan pa'i grags pa sgrog par byed do zhes thos so/ /byis blo'i spyod yul las 'das dam pa khyod/ /byis pa'i khrod 'di 'dul ba'i don gzigs nas/ /byis pa'i tshul gyis ljongs 'dir rol bzhin du/ /byis pa'i spyod pa spangs pa 'di ngo mtshar/ /dgung lo drug bzhes pa'i tshe khu bo chos kyi rje sangs rgyas rgyal mtshan las dpal kye rdo rje man ngag lugs kyi dkyil 'khor du dbang bzhi