[A:381]gzhan mi gda'/ yod du chug kyang bla ma dam pa 'di sbyin pa'i bdag po rtsis gnas gsar pa'i pha dang ma dang / gnyen dang grogs thams cad gtso bo'i tshab yin la/ sku drin gyi cha phra mo re re nas bsams kyang khyer ba'i mtha' ma mchis pa la ma mchis par ngo shes/ thag chod srog kyang dam pa 'di'i phyogs su gtong ba la the tshom dang ya 'ud ci yang med pa'i zhal ngo yab yum sras dang bcas pa'i mi phyed pa'i dad pa chen pos kun nas blangs te bsgrubs pa yin la/ 'gyed chas rnams la slob ma gzhan gyis gdung 'bul la byung ba dang / phyag gi rten dang phyag dpe sogs kyang cung zad song / mdor na bla ma 'di'i phyogs su bdag cag rnams kyi lus longs spyod dus gsum du bsags pa'i dge ba thams cad skal pa'am skal pa bas lhag par nyin re bzhin yang 'bum phrag du ma btang kyang ches chungs pa kho na las ma mchis mod kyang / re zhig bdag cag rnams kyi nus pa de tsam du zad do/ /grangs med bskal par tshogs gnyis legs goms pas/ /tshad med sku dang zhing la mnga' brnyes slad/ /dpag med mchod pas dus kun mnyes lags mod/ /mgon med bdag sogs bsod nams spel slad du/ /mtha' yas dge 'dun 'dus pa'i bsnyen bkur zhing / /bsam yas skye bo'i sbyin gtong rgya cher bgyis/ /bgrangs yas rgyal ba'i dkyil 'khor mchod pa sogs/ /dpag yas dge bas nyin mtshan 'da' bar bgyis/ /de dag gi dus thams cad du mtshan mo char gyi rgyun yid du 'ong ba 'bab cing / nyin mo ni nam mkha' yongs su dag pa anda rnyil gyi me long ltar dwangs pa'i ngos su/ sna lnga