[A:260]tan rgya mtsho'i dbon mo hor mo dpal la zhes bya ba bud med kyi skyon brgyad spangs shing rigs dang gzugs dang snying rje dang phan sems la sogs pa'i yon tan du mas brgyan pa de ni rje 'di nyid bskyed par mdzad pa'i yum yin no/ /yid 'ong bdud rtsi'i 'od can zla ba'i gzugs/ /rnyog bral dwangs pa'i chu mtshor ngang gis 'char/ /snying rjes gzhan don la chags dam pa rnams/ /skyon med mtho zhing gtsang ba'i rigs su byung / /de lta bu'i yab yum gnyis la rigs kyi sras bzhi 'khrungs pa'i thu bo ni bdag cag gi bla ma yon tan ma lus pa'i phung por gyur pa 'di yin la/ 'di nyid yum gyi lhums su zhugs pa na zo mdog bzang zhing lus shing bal ltar yang ba dang / rang bzhin gyis dge ba la spro zhing ting nge 'dzin ngang gis skye ba sogs rgyal ba'i sras chen po rnams la ji skad 'byung ba'i dge mtshan rnams mngon du gyur bzhin pa'i ngang nas thub pa'i dbang po yongs su mya ngan las 'das pa'i tshul bstan nas rje btsun sa skya pa'i bzhed pas lo gsum stong drug brgya dang dgu 'das pa gser 'phyang zhes bya ba me mo bya'i lo snron gyi zla ba'i tshes bco lnga la yum la gnod pa med cing ngo mtshar ba'i ltas du ma dang lhan cig tu sku bltams par gyur to/ /gang gis las nyon 'ching ba kun spangs slad/ /dbang med skye ba'i 'dam las brgal zin mod/ /bdag sogs mgon med 'gro la rjes brtse bas/ /bsam bzhin skye ba'i zlos gar 'di ngo mtshar/ /khye'u de yang bzhin gyi dkyil 'khor zla ba nya ba lta bu shangs kyi gzengs mtho ba/ mthong na mi mthun pa med pas skye bo thams cad kyi yid 'phrog par mdzad pa la sogs pa'i dge mtshan dang ldan pa zhig ste/ mtshan chos skyong skyabs