[A:377]'phel/ /'on kyang chos kun rang sems snang ba'i rtsal/ /med bzhin bden par bzung bas byis pa bslus/ /brjod med rang ngo ltos zhes gsungs pa de/ /dran nas sems la ngal gso cung zad thob/ /blo 'das gnyug ma'i ngang du khyed nyid dang / /rang sems so sor dbye ba ma shes par/ /'od gsal don gyi bla ma phyag rgya che/ /rang zhal mjal dus bde chen bdud rtsis myos/ /yab rje nyi ma mkha' dbyings thim na yang / /sras mchog bsil zer bdag po rnam par mdzes/ /slob phran rgyu skar phreng bas thub bstan gyis/ /nam mkha' phyug snyam sems la ngal gso thob/ /de'i dus char ye ma babs pas lo tog rnams phal cher skams shing sems can rnams mya ngan du gyur pa na/ zhi bar gshegs pa'i de ma thag nas bzung de char gyi rgyun lhag par babs pas lo tog dang rtsi tog thams cad smin zhing rgyas par byas la skye bo rnams kyang dga' bar byas/ 'di lta bu ni nges par rje btsun rdo rje 'chang de'i byin rlabs yin nges zhes dad gus cher 'phel bar gyur te/ chos kyi char chen pos sems can gyi rgyud nyon mongs pa'i thabs ma rungs par gyur pa mang po zhig brlan par mdzad de/ mi gnas pa'i mya ngan las 'das pa'i 'bras bus smin par mdzad pa'i phyi nang gi rten 'brel las byung ba yin nam snyam/ dus de nas deng sang gi bar dus kyi mchod pa chen po'i tshe/ char dkon pa'i tshe lhag par 'bab pa dang / ha cang ches pa na 'then pa nges par 'byung ba thams cad kyis mngon sum du mthong ba yin mod/ bdag rnams rta nag tu 'dug pa gtam