[A:378]ngan khyer ba'i pho nya ba bya bzhin du mgyogs pas gnam gang gi nyin phyed tsam la sleb pa ltar/ mtshan bshad nas byon pas tshes gcig gi nyi rtsel rdzong du phebs/ de 'phral sku gdung rin po che yid bzhin nor bu de nyid la sku khrus gsol ba sngon du 'gro bas zhabs tog bgyis pa na'ang / gsang ba'i gnas lta bas mi mngon zhing / dbu'i gtsug tor mchog tu 'phags la/ spyan dang shangs dang mchu'i sgros mtha' zhal bzhugs pa'i dus ji lta ba ma gtogs cung zad tsam yang ma nyams pa/ sku'i mdangs zla ba ltar dkar zhing yid du 'ong ba'i dri zhim po rnams dang bcas pa zhig 'dug la/ 'di dag phyis zhugs la 'bul ba'i dus gdung sgrom nas spyan drangs pa'i tshe yang cung zad kyang ma nyams pa sngon ji lta ba de kho nar snang ste/ rnyog bral mkha' la snang ba'i 'ja' tshon bzhin/ /gdul bya'i ngor byas phung po 'di bstan gyis/ /rnam smin rdos bcas lus dang mi 'dra zhes/ /mchog dman khyad par 'byed la mngon sum bzhin/ /de nas dri ma med cing mdangs bkra ba'i gos dar gyi na bza' dang / /dri bzang po'i bye brag bsam gyis mi khyab pas bkur stir bgyis te gdung sgrom gyi mchod rten du spyan drangs te zhal ngo so so dad ldan rnams kyis phul ba'i bla re dang / rten khebs dang / dar yug dang / gos chen la sogs pa na bza' du mas mdzes par klubs/ mchod pa'i bye brag bsam gyis mi khyab pa kun tu bzang po'i mchod sprin ltar bshams te lha dang bcas pa'i 'jig rten rnams kyi mchod pa'i zhing dam par bzhugs su gsol/ de nub nas bzung ste rje dbon rin po che dpon slob rnams kyis dpal kye rdo rje