[A:373]gzigs shing zhal 'dzum pa zhig mdzad/ de ma thag gzugs sku'i bkod pa chos dbyings su bsdu ba'i tshul bstan te/ de'ang sngar smos pa ltar dgung lo bcu dgu las mi bzhugs pa de bzhi bcu zhe bzhi'i bar bsrings/ de nas srog rtsol zhag bdun pa des drug cu rtsa gcig gi bar bsrings 'dug la/ de lo sku dog shin tu che ba yod 'dug pa ltar gcung po chos kyi rje'i mnal lam du bde ba can la spyan 'dren pa mang po lhags/ rje nyid kyang 'byon spro bar 'dug pa la/ bse 'bag yin snyam pa zhig gis phyag phul te yun ring du bzhugs dgos zhus pa na/ rdo rje 'phreng ba dang / mkha' 'gro rgya mtsho 'di gnyis dar po mi 'dug pas 'di gnyis spel thub pa zhig byas te lo lnga bsdad nas yong gi zhes pho nya ba de dag bzlog par mdzad pa gsal po zhig byung 'dug pa ltar/ bo dong rdzong gi gzims chung phun tshogs rab brtan du rdo rje bzlas pa zhag bdun pa zhig mdzad pa dgung skeg las grol/ de nas lo re bzhin sbyin bdag chen pos gsol ba btab ste/ jo nang nas sgrub chen ma bde ba dpal mo dpon slob lnga drug res lo re bzhin brtan bzhugs 'bul ba dang / rdo rje'i bzlas pa yang lo re bzhin mdzad kyi 'dug pa'i/ stag mo brtan bzhugs kyi skabs/ bdag kyang rta nag nas zhabs drung du sleb/ tshogs 'khor gyi thog tu 'bul ba rgya chen po dang bcas sbyin bdag chen po yab yum sras bcas kyis yun ring du bzhugs pa'i gsol ba 'debs kyi 'dug pa ltar/ bdag gis kyang gnyan lotstsha ba dang sgrub chen khyung po sogs kyis sku tshe'i lo rgyus zhus/ de tsam bzhugs par zhus pas bzhad pa tsam zhig mdzad/ bdag la gsol ras gsum gnang ba'ang brda thabs su 'dug mod phyis su go ba tsam du gda'/ mdor na/ thub pa'i dbang po chos kyi dbyings su snyoms par bzhugs nas dus 'khor ba ltar na lo gnyis stong sum brgya