[A:241]'bebs/ /de lta'i ltas mthong 'dzam gling gser ldan ma/ /lan brgyar g.yo zhing ca co sgrog pa yis/ /bdag cag rnams la ring nas 'bod byed cing / /phyogs kyi bu mo'ang 'gran zlar 'ongs pa snyam/ /de lta mod kyi gzugs sku'i snang brnyan ni/ /gang nas byon pa'i chos sku'i zhing khams su/ /bde chen bdud rtsis myos pas rab gzims nas/ /slar yang chu 'dzin mkha' dbyings 'thon pa'am/ /bai DUr sa gzhir lha dbang snang brnyan ltar/ /sgyu 'phrul dra ba'i zlos gar bye ba brgyas/ /mkha' mnyam 'gro 'di rtag par skyong ba la/ /blo chung nyam thag sdug bsngal ci zhig bya/ /srid zhi'i chos kun sems nyid snang ba tsam/ /chos dbyings ngang na ro mnyam 'gyur med bde/ /rang sems bla ma bde chen phyag rgya che/ /blo 'das brjod bral rang zhal rgyun par mjal/ /de la dbang bzhi'i chu bo khor yug nod/ /de lta'i rje btsun gsung gi bdud rtsi'i ros/ /snying gi bum bzang gang ba de dran nas/ /bdag cag srog gi 'tsho ba thob par gyur/ /de nas gzhal du med pa'i sku gdung rin po che nyid/ sman dang dri bzang dang gos dar ras yug la sogs pas gril nas za ma tog gi nang du spyan drangs/ dbu rgyan rgyan drug dar zab la sogs pas klubs nas gdung sgrom gyi khrir mchod pa'i sprin spungs kyi dbus su bzhugs su gsol nas/ rgyud sde rin po che nas bshad pa'i bla ma'i rnal 'byor dang rjes su 'brel pa'i cho gas yun ring du gsol ba btab pa'i tshe'ang thams cad sems bying rgod dang bral zhing khams dwangs la dge sbyor gyi 'char sgo stobs che bas sdug