[A:240]ngo mtshar ba'i ltas sna tshogs ston par byed/ bdag cag rnams ni rgya mtsho'i klong du ded dpon dang bral ba'i tshong phrug gi tshogs 'khyams pa ji lta bar ci bya brtol med par gyur/ kye hud 'jigs rung 'khor mtsho'i rba klong du/ /dam pa'i ded dpon lan cig rnyed pa de/ /rmi lam sgyu 'phrul ji bzhin de ring yal/ /da ni mgon med bdag rnams ci zhig bya/ /las kyi rta ljang shing rta'i rtser phyogs pa'i/ /sems kyi sdug bsngal nyi ma'i thig 'phreng gis/ /snying gi ku mud zum pa'i ngal ba las/ /'gram pa'i kun da lag pa'i chu mtshor brten/ /khyod sku dran pa'i 'bigs byed dri bzhon gyis/ /tsu ta'i ze'u 'bru'i rdul gyis dkrugs pa'i mig /'chi ma'i ga bur gzegs mas lus bran pa/ /'khri shing bzhin du 'dar zhing 'dzin mar lhung / /sgyu ma'i lus 'di chu gter phung por snang / /min na mchi ma'i chu klung gang las babs/ /bdag gi snying 'di lcags kyi gong bur shes/ /min na dum bur mi 'gas rgyu mtshan ci/ /de ring bdud rtsi'i 'od can dang / /ma la ya yi rlung 'jam dang / /tsandan thigs pa'i chu gzegs kyang / /bdag gi snying la gdung byed gyur/ /dpal ldan sa yi thig le khyod/ /'og min gtsang ma'i gdan khri la/ /chos kyi rgyal por mnga' gsol slad/ /sa steng 'gro 'di'i sluu brid du/ /brgya byin sgyu ma'i mkhan po des/ /anda rnyil gyi me long ngos/ /gzhu ris gsar pa'i tshon brgya yis/ /ngo mtshar bkod pa ci yang bris/ /de tshe 'chi med gzhon nu rnams/ /dga' ba bzhin dang skyengs pa bzhin/ /yid 'phrog sil snyan 'khrol byed cing / /puNDa ri ka'i char pa