[A:239]zla bcu pa smin drug gis nya ba'i tshes bco lnga'i snga dro dgyes shing spro ba'i mdangs dang bcas nas birWa pa'i sku'i rnam 'gyur dang gsung mgur gyi rnam pa 'ga' mdzad/ nyi ma snga phyed tsam na sku drang por bsrangs te zhal shar du gzigs nas rgyud sde rin po che nas bshad pa'i 'da' kha ma'i thugs dam zab mos mtshams sbyar te/ mkha' khyab kyi t-ing nge 'dzin 'gog pa'i bden pa rnam par grol ba'i ye shes kyi sku mngon du mdzad de/ dpa' bo dang rnal 'byor ma ri rab kyi rdul dang grangs mnyam pa nam mkha' khyab pa rnams kyis lha rdzas kyi me tog la sogs pa'i mchod pa gdugs dang rgyal mtshan la sogs pa g.yo ba bzhin pas spyan drangs/ lha dang rig pa 'dzin pa du mas mdun nas bdar/ sangs rgyas dang byang chub sems dpa' dpag tu med pas sngon nas bsus/ 'jig rten skyong ba rnams kyis zhabs nas bteg ste/ 'ja' dang 'od kyi lam nas 'og min dag pa'i zhing du gshegs par gyur to/ /de'i tshe kha ba shin tu che ba ri klung thams cad chu shel lam ku mu da'i gling ltar dkar ba'i kha dog 'ba' zhig tu gyur pa zhig babs te sangs rgyas kyi bstan pa dkar 'jam du mdzad pa'i phyi nang gi rten 'brel las byung ba yin snyam/ sang de nas bzung ste nam mkha'i ngos ni baiDUrYa ltar dwangs shing gsal ba'i dbyings na/ 'ja' sprin dkar shas che ba la sna tshogs pa'i 'od chags pa'i yug ring dang / gdugs rgyal mtshan/ 'phan/ lda ldi la sogs pa'i rnam pa dang / gzhan yang phyag mtshan dang / skye 'gro'i gzugs brnyan gyi dbyibs sogs du ma'i bkod pa bkram pa'i khrod nas lha rdzas kyi me tog gi char pa'ang nyi zer gyi rdul ltar zim bur 'bab pa sogs