[A:233]rab 'byams pa yon tan rin chen/ dpal mgon zhal bzhi pa'i bsnyen pa 'bum phrag brgya gdan thog gcig tu mdzad cing / mkha' 'gros tshogs 'khor gyi skal ba skyel bar grags pa grub mchog bkra shis seng ge /dpal mgon chen po'i zhal mngon sum du mthong ba chu bo gyen la ldog pa la sogs pa'i rdzu 'phrul ya ma zung sna tshogs ston pa bla ma yakSha kro te/ blo gsal 'ga' la phan 'dogs pa rab 'byams pa dpal ldan blo gros/ gzhan yang rgya chen rgyud sde'i gnad shes pa/ bskyed rim gyi gsal snang thob pa/ rig sngags kyi bden tshig grub pa/ sgyu lus rmi lam gyi sprul bsgyur la rang dbang thob pa/ 'pho ba dang bar do 'byongs pas mkha' spyod la yud kyis chas pa/ bla ma'i mos gus kho nas sems phrogs te sa lam cig chod du song ba sogs/ mdor na lung rtogs kyi yon tan gzhan ci yang ma mchis kyang rje bla ma'i bka' drin 'khor thabs med pa rjes su dran pas gar gnas su gsol 'debs kyi ca co 'ur chil la ba bdag lta bus mtha' brten pa'i bu slob nam mkha'i skar phran tsam gyis bshad sgrub kyi sgo nas bstan pa rin po che nam langs shing nyi ma shar ba ltar phyogs bcur rgyas par byed pa ni bsam pa'i ra ba las 'das pa yin no/ /de bzhin du bod rgyal po'i gdung brgyud dri ma med pa khri nam mkha' bsod nams brtan pa'i rgyal mtshan dpal bzang po/ rigs rus cho 'brang ldan cing stobs kyi 'khor los sgyur ba/ thun mong