[A:159]de dag gi rnam sprul du grub pa yin no/ /gzhan yang slob dpon chen po padma 'byung gnas kyis rjes su bzung ba'i gsang sngags rnying ma'i gter ston rig 'dzin chen po padma gling pas kyang / rje 'di nyid bram ze mchog sred kyi rnam sprul yin no zhes gsung bar grags shing / lho brag sman mdo'i brag nas bton pa'i bram ze mchog sred kyi phyag phur kyang rje 'di nyid la byung ba yin no/ /sku skye ba 'di'i gong ma ni byang la stod kyi byang sbug bya ba'i dgon pa'i bla ma/ phyag rdor zhal gzigs shing sde brgyad bran du 'khol ba/ sa skya pa'i chos skyong gsar rnying la nus pa thon pa zhig yin no/ /zhes rje nyid gsung 'byon mkhyen tsam na lhug par gsungs par snang ngo / /gzhan yang la stod lho phyogs su 'khrungs tshul de dus kyi sku nye zhig kyang deng sang 'khor du yod tshul sogs kyang zhabs 'bring ring du bsten pa'i ngag las thos so/ /nA ro mai tri'i thugs bcud chu klung gis/ /gang blo'i dri bral rnal 'byor he ru kaH/ /thugs kyi me long dag pa'i gsal snang du/ /khyod nyid dang po'i sangs rgyas 'khor ba 'jig /'od gsal gnyid kyis myos pa'i lwa ba pa/ /byang phyogs grub pa'i gtsug rgyan phag gru pa/ /rmad byung 'gro ba 'dren pa'i zlos gar gyis/ /bgrang yas sprul pa'i rnam rol spro bar shar/ /de mthong zhal gyi pad dkar bzhad pa las/ /lung bstan sbrang rtsi'i dog pa ci yang skyugs/ /rmad byung gtam gyi ze'u 'bru gsal bar phye/ /grags snyan dri bzhon gsar pas phyogs kun khyab/ /