[A:160]padmas rjes bzung rig sngags 'chang ba'i gtsos/ /padma'i bka' bzhin 'phrin las mtshan ma phul/ /padmas lung ston bram ze chen po zhes/ /padma gling pas 'dzam gling kun tu bsgrags/ /ma lus phyogs kyi bgrang yas rgyal ba rnams/ /bskrun mdzad 'khor lo'i mgon po khyod gcig pu/ /nye tshe smra 'di bdag blo'i nyes par zad/ /'on kyang blo dman gdul bya'i snang ngor lags/ /de dag la 'di skad ces bya ste/ 'khor ba 'jig dang lwa ba'i na bza' can/ /bram ze mchog sred bde gshegs phag gru pa/ /rig sngags grub pa'i ri sbug rnal 'byor zhabs/ /rje btsun chos rje'i sngon gyi skyes rabs yin/ /gnyis pa la bzhi ste/ rigs rus cho 'brang ldan par sku 'khrungs nas rgyal srid chos bzhin du bskyangs tshul/ rgyal ba'i bstan pa la rab tu byung zhing yongs 'dzin dam pa rnams bsten nas rgya chen thos bsam gyi sgro 'dogs dpyad tshul/ rtse gcig tu nyams su bzhes pas thugs rgyud la lung rtogs kyi yon tan bsam gyis mi khyab pa 'khrungs shing bstan pa dang sems can gyi don rgya chen po mdzad tshul/ zhing 'di'i mdzad pa mthar phyin nas gzugs kyi sku chos dbyings su bsdus te chos kyi sku rnam pa thams cad pa mngon du mdzad tshul lo/ /dang po ni/ tsha bas gdungs la gdugs dkar bsil yab dang / /chags ldan gzhon nu'i yid la smin legs bzhin/ /dam pa'i mdzad pas gzur gnas dpyod ldan gyi/ /snying la dga' ba mi ster su zhig yod/ /de la bdag nyid chen po 'di nyid 'khrungs pa'i yul ni/ rab tu dkar ba'i gangs ri'i phreng bas kun